सावंतवाडी,दि.२७: शिक्षण प्रसारक मंडळाचे अध्यक्ष आणि सिंधुदुर्ग जिल्हा परिषदेचे सदस्य विक्रांत विकासभाई सावंत यांच्या वाढदिवसाचे औचित्य साधून त्यांच्या कार्यकर्ते आणि हितचिंतकांच्या वतीने सावंतवाडी आणि दोडामार्ग तालुक्यात विविध सामाजिक, आरोग्यविषयक आणि सांस्कृतिक कार्यक्रमांचे जंगी आयोजन करण्यात आले आहे. केवळ औपचारिक शुभेच्छा देण्याला फाटा देत, आरोग्य शिबिरे, गरजू वस्तूंंचे वाटप आणि मनोरंजनाचे दर्जेदार कार्यक्रम आयोजित करून हा वाढदिवस पूर्णपणे सामाजिक बांधिलकी जपत साजरा केला जाणार आहे. विक्रांत विकासभाई सावंत यांच्या जिल्हा परिषद मतदारसंघात आणि शिक्षण प्रसारक मंडळ सावंतवाडीच्या विद्यालयांमध्ये या विविध उपक्रमांचे आयोजन करण्यात आले आहे.
या भव्य वाढदिवस सोहळ्याची सुरुवात २७ मे रोजी रात्री ठीक १२ वाजता ओटवणे हायस्कूलच्या पटांगणावर केक कापून केली जाणार असून, वाढदिवसाच्या या विशेष क्षणाचे औचित्य साधून त्याच ठिकाणी रसिक प्रेक्षकांसाठी भव्य महिला दशावतार नाट्यप्रयोगाचे आयोजन करण्यात आले आहे. त्यानंतर वाढदिवसाच्या मुख्य दिवशी, म्हणजेच २८ मे रोजी दिवसभर विविध सामाजिक उपक्रम राबवून गरजूंना मदत केली जाणार आहे. यामध्ये सरमळे येथील रमाई नगर येथे चार हायस्पीड फॅनचे वाटप करण्यात येणार आहे.
आरोग्य क्षेत्राला बळकटी देण्यासाठी कार्यकर्त्यांनी या निमित्ताने विशेष पुढाकार घेतला असून २८ मे रोजी माजगाव येथील विक्रांत सावंत यांच्या निवासस्थानी ‘लॉरेन्स अँड मेयो’ यांच्या सहकार्याने मोफत डोळे तपासणी शिबिराचे आयोजन करण्यात आले आहे. या शिबिरात परिसरातील २५ गरजू रुग्णांना मोफत चष्म्यांचे वाटप केले जाणार आहे. यासोबतच दोडामार्ग उपजिल्हा रुग्णालयातील महिला सुतिकागृहासाठी इंडक्शन मशीन आणि सात लीटरचा थर्मास भेट म्हणून दिला जाणार आहे. याप्रसंगी नगराध्यक्ष चेतन चव्हाण, माजी नगराध्यक्ष संतोष नानचे व जिल्हा परिषद सदस्य दीपक गवस प्रामुख्याने उपस्थित राहणार आहेत. तसेच सावंतवाडी उपजिल्हा रुग्णालयासाठी देखील उपयुक्त भेटवस्तू दिल्या जाणार असल्याची माहिती कार्यकर्त्यांनी दिली आहे.
वाढदिवसाच्या दिवशी संध्याकाळच्या सत्रात सांस्कृतिक कार्यक्रमांची मोठी रेलचेल पाहायला मिळणार आहे. वेत्ये येथील कलेश्वर पूर्वी देवी मंदिरात रात्री साडेआठ वाजता ‘राजा शिवाजी’ हा ऐतिहासिक सिनेमा दाखविण्यात येणार आहे, तर सोनुर्ली येथे रात्री ठीक दहा वाजता कुळघर रंगमंच येथे भव्य दशावतार नाट्यप्रयोगाचे आयोजन करण्यात आले आहे. सावंतवाडी आणि दोडामार्ग तालुक्यातील या सर्व सामाजिक आणि सांस्कृतिक कार्यक्रमांना नागरिक, कार्यकर्ते आणि हितचिंतकांनी मोठ्या संख्येने उपस्थित राहावे, असे आवाहन विक्रांत सावंत मित्रपरिवाराकडून करण्यात आले आहे.
