माजगाव मतदारसंघातून विक्रमी विजयाबद्दल शिक्षण प्रसारक मंडळाच्या वतीने विक्रांत सावंत यांचा भव्य सत्कार
सावंतवाडी, दि.२३: विक्रांत सावंत यांचा स्वभाव अत्यंत नम्र असून त्यांची माणसं जोडण्याची विलक्षण हातोटी मला प्रचंड भावते. त्यांनी नेहमी मोठी स्वप्ने पहावीत, भविष्यात ते एक मोठे नेते आणि आदर्श व्यक्तिमत्व म्हणून निश्चितच उदयोन्मुख होतील, असा ठाम विश्वास सिंधुदुर्ग जिल्हा शिवसेना प्रमुख तथा माजी नगराध्यक्ष संजू परब यांनी व्यक्त केला. जिल्हा परिषद निवडणूक २०२६ मध्ये माजगाव मतदारसंघातून विक्रमी मताधिक्याने विजयी झाल्याबद्दल आणि शिक्षण व कृषी समितीचे सदस्य म्हणून निवड झाल्याबद्दल शिक्षण प्रसारक मंडळ सावंतवाडीच्या वतीने संस्थेचे अध्यक्ष विक्रांत सावंत यांचा भव्य सत्कार करण्यात आला, त्याप्रसंगी परब बोलत होते.
राणी पार्वती देवी हायस्कूल व ज्युनिअर कॉलेजच्या सभागृहात संपन्न झालेल्या या सोहळ्यात विक्रांत सावंत यांच्यावर अभिनंदनाचा वर्षाव करण्यात आला. यावेळी व्यासपीठावर शिवसेना जिल्हाप्रमुख संजू परब यांच्यासह माजी नगराध्यक्ष बबन साळगावकर, शिक्षण प्रसारक मंडळाचे सचिव व्ही. बी. नाईक, उपाध्यक्ष डॉ. दिनेश नागवेकर, खजिनदार सी.एल. नाईक, चंद्रकांत सावंत, अमोल सावंत आदी मान्यवर उपस्थित होते.
यावेळी बोलताना माजी नगराध्यक्ष बबन साळगावकर म्हणाले की, विक्रांत सावंत यांना कै. भाईसाहेब सावंत आणि कै. विकास सावंत यांचा मोठा वारसा लाभला आहे. त्यांनी कै. अजित पवार यांच्या कामाचा धडाका समोर ठेवून जनसामान्यांसाठी काम करावे. पुढच्या वेळी निवडणूक लढवताना प्रचाराला जाण्याचीही गरज भासणार नाही, इतके सक्षम कार्य त्यांच्या हातून घडावे. जिल्हा परिषद अध्यक्षपदापर्यंत त्यांनी मजल मारावी, अशा शुभेच्छा साळगावकर यांनी यावेळी दिल्या.
शिवसेना जिल्हाप्रमुख संजू परब यांनी शुभेच्छा देताना विक्रांत सावंत यांच्या क्षमतेवर शिक्कामोर्तब केले. ते म्हणाले की, आज कै. विकास सावंत या सत्काराला उपस्थित असते तर त्यांना प्रचंड आनंद झाला असता. विक्रांत यांच्यात जिल्हा परिषद अध्यक्ष होण्याची पूर्ण क्षमता आहे. त्यांनी मोठी स्वप्ने पहावीत. सध्या माझे स्वप्न आमदारकीचे आहे, त्यामुळे मी आमदार झाल्यानंतर त्यांनीही आमदारकीचे स्वप्न उराशी बाळगावे, असे भावनिक आवाहन परब यांनी केले.
सत्काराला उत्तर देताना विक्रांत सावंत यांनी आपल्या भावना व्यक्त केल्या. ज्येष्ठांचे आशीर्वाद, मतदारांचे प्रेम आणि कुटुंबाची पुण्याई यामुळेच हा विजय मिळवता आला, असे सांगून आपल्या पदाचा पूर्ण उपयोग हा जनसामान्यांच्या कल्याणासाठी आणि मतदारसंघाच्या विकासासाठीच होईल, अशी ग्वाही त्यांनी दिली. या कार्यक्रमात अमोल सावंत, वसुधा मुळीक, प्रा. केदार म्हसकर, दशरथ शृंगारे यांसह विविध प्राध्यापकांनी मनोगत व्यक्त केले.
सत्कार सोहळ्यानंतर प्रा. रूपेश पाटील यांनी विक्रांत सावंत यांची प्रकट मुलाखत घेतली, ज्यातून त्यांच्या कार्याचा प्रवास उलगडला गेला. या कार्यक्रमाला सोनाली सावंत, के.टी. परब, नारायण देवरकर, सीमा मठकर, संप्रवी कशाळीकर, डॉ. सुमेधा नाईक-धुरी यांच्यासह संस्थेचे प्राचार्य, शिक्षक आणि शिक्षकेतर कर्मचारी मोठ्या संख्येने उपस्थित होते. कार्यक्रमाचे प्रास्ताविक संप्रवी कशाळीकर यांनी केले, सूत्रसंचालन प्रा. मिलिंद कासार यांनी केले तर आभार डॉ. सुमेधा नाईक-धुरी यांनी मानले. हा कार्यक्रम यशस्वी करण्यासाठी आरपीडी प्रशालेतील सर्व शिक्षक आणि सांस्कृतिक समितीच्या सदस्यांनी विशेष परिश्रम घेतले.
