महामानवांना केवळ डोक्यावर नको डोक्यात घ्या! : प्रा. रूपेश पाटील

माजगाव शाळेत महात्मा ज्योतिबा फुले जयंतीनिमित्त विविध स्पर्धा संपन्न.

सावंतवाडी,दि.१३: अलीकडे आपण महामानव डोक्यावर घेऊन नाचत आहोत. मात्र आम्हाला आज महामानव किंवा डोक्यावर घेऊन नाचण्याची नव्हे तर डोक्यात घालून त्यांचे चरित्र वाचण्याची गरज आहे. परिस्थितीच्या विरोधात अत्यंत खंबीरपणे मोठ्या हिमतीने ज्यांनी महिलांसाठी आणि बहुजनांच्या शिक्षणासाठी शेवटच्या श्वासापर्यंत लढा दिला. कष्टकरी श्रमजीवी आणि शेतकरी बांधवांचा विचार करून शेतकऱ्यांचा आसूड आणि गुलामगिरी यांसारखे ग्रंथ लिहून आमची डोके सुपीक केली अशा महात्मा फुले सावित्रीबाई फुले आणि डॉक्टर बाबासाहेब आंबेडकर यांसारखे तमाम महापुरुष आम्ही धोक्यात कधी घेणार असा सवाल प्रेरणादायी वक्ते प्राध्यापक रुपेश पाटील यांनी माजगाव येथे स्वर्गीय भाईसाहेब सावंत माध्यमिक विद्यालय येथे आयोजित कार्यक्रमात केला. ११ एप्रिल १८२७ रोजी महात्मा ज्योतिबा फुले यांचा जन्म झाला एक प्रभावी मराठी लेखक, विचारवंत, समाजसुधारक, सामाजिक कार्यकर्ता, सत्यशोधक समाजाची स्थापना करणारे तसेच स्त्री शिक्षणाची मुहुर्तमेढ ज्यांनी रोवली असे महात्मा ज्योतिबा फुले यांच्या जयंती निमित्त कोकण कला व शिक्षण विकास संस्था आणि डॉ. आंबेडकर फाऊंडेशन यांच्या संयुक्त विद्यमाने श्री भाईसाहेब सावंत माध्यमिक विद्यालय, माजगाव, सावंतवाडी येथे विविध शैक्षणिक व सांस्कृतिक स्पर्धांचे उत्साहात आयोजन करण्यात आले. या कार्यक्रमात प्रा. रुपेश पाटील प्रमुख वक्ते म्हणून बोलत होते. या स्पर्धेत सावंतवाडी तालुक्यातील विविध शाळांमधील विद्यार्थ्यांचा उत्स्फूर्त प्रतिसाद लाभला.

इयत्ता ५ वी ते ८ वी (लहान वगट) व इयत्ता ९ वी ते ११ वी (मोठा गट) या दोन गटांमध्ये स्पर्धा घेण्यात आल्या. विद्यार्थ्यांमधील कला, विचारशक्ती, सर्जनशीलता, नेतृत्वगुण आणि राष्ट्रप्रेम वाढीस लागावे हा या उपक्रमाचा मुख्य उद्देश होता.

या कार्यक्रमांतर्गत चित्रकला, निबंध लेखन, वक्तृत्व, वेशभूषा (फॅन्सी ड्रेस) आणि पोस्टर मेकिंग अशा पाच स्पर्धा घेण्यात आल्या. चित्रकला स्पर्धेत विद्यार्थ्यांनी ए-३ आकाराच्या कागदावर वॉटर कलरच्या सहाय्याने महात्मा फुले यांच्या जीवनप्रवासाचे प्रभावी चित्रण केले. निबंध स्पर्धेत त्यांच्या देशहितासाठीच्या कार्याचा सखोल आढावा विद्यार्थ्यांनी मांडला.

वक्तृत्व स्पर्धेत विद्यार्थ्यांनी महात्मा फुले यांच्या नेतृत्वगुणांवर व राष्ट्रउभारणीतील योगदानावर अभ्यासपूर्ण विचार व्यक्त केले. वेशभूषा स्पर्धेत भारतासाठी योगदान देणाऱ्या महान व्यक्तिमत्त्वांची भूमिका साकारून विद्यार्थ्यांनी उपस्थितांची दाद मिळवली. पोस्टर मेकिंग स्पर्धेत महात्मा फुले यांच्या विचारांचे प्रभावी सादरीकरण करण्यात आले.

या कार्यक्रमाला वक्ते विचारवंत व प्रेरणादायी वक्ते प्रा. रुपेश पाटील, सावंतवाडी नगर परिषदेच्या माजी उपनगराध्यक्ष श्रीमती अन्नपूर्णा कोरगावकर, एस. पी. के. महाविद्यालयाचे प्रा. डॉ. देविदास बोर्डे यांनी महात्मा ज्योतिबा फुले यांच्या विविध जीवन पैलूवर मार्गदर्शन केले . यावेळी प्रशालेचे मुख्याध्यापक भाऊसाहेब चवरे, सहाय्यक शिक्षिका श्रीमती प्राजक्ता गावडे, सहाय्यक शिक्षक चंद्रशेखर सावंत आदी मान्यवर उपस्थित होते.

स्पर्धेतील प्रथम तीन विजेत्यांना ट्रॉफी,प्रमाणपत्र व आकर्षक बक्षीस देऊन गौरविण्यात आले. कार्यक्रमाचे प्रास्ताविक श्री प्रथमेश सावंत यांनी केले, तर सूत्रसंचालन व आभार प्रदर्शन समीर शिर्के यांनी केले.
कोकण कला व शिक्षण विकास संस्था गेली १४ वर्षे सामाजिक, शैक्षणिक व आरोग्य विषयक क्षेत्रात उल्लेखनीय कार्य करत असून कोकण संस्थेचा आदर्श इतर सामाजिक क्षेत्रात काम करणाऱ्या संस्थांनी देखील घ्यावा असे सांगून प्रा. रुपेश पाटील यांनी कोकण कला व शिक्षण विकास संस्था आणि त्यांचे संस्थापक अध्यक्ष तथा सामाजिक कार्यकर्ते दयानंद कुबल यांच्या कार्याबद्दल गौरवोद्गार काढले व महात्मा ज्योतिबा फुले यांच्या जीवन प्रवासाविषयी विद्यार्थ्यांना मार्गदर्शन केले. यावेळी उपस्थित असलेले प्रा. देविदास बोर्डे यांनी शिक्षण आणि समानता याविषयी विद्यार्थ्यांना मार्गदर्शन केले तर श्रीम. अन्नपूर्णा कोरगावकर यांनी अंधश्रद्धा आणि अन्यायाविरुद्ध कशाप्रकारे ज्योतीबांनी आवाज उठवला याबद्दल विद्यार्थ्यांना मार्गदर्शन केले
कार्यक्रमाच्या यशस्वी आयोजनासाठी कोकण संस्था प्रतिनिधी गौरी आडेलकर, रूचा पेडणेकर, हर्षदा कोरगावकर, वैष्णवी म्हाडगुत, तन्वी केसरकर व शुभम लोणाग्रे यांचे मोलाचे सहकार्य लाभले.

महात्मा ज्योतिबा फुले यांच्या जयंतीनिमित्त आयोजित या कार्यक्रमामुळे विद्यार्थ्यांमध्ये प्रेरणा, जागरूकता आणि सामाजिक जाणीव वाढीस लागल्याचे चित्र पाहायला मिळाले.