स्थापना दिनानिमित्त सावंतवाडी विधानसभा मतदारसंघातील हजारो घरांवर फडकणार भाजपचा भगवा ध्वज!
सावंतवाडी,दि.०५: भारतीय जनता पार्टीच्या स्थापना दिनाचे औचित्य साधून सावंतवाडी विधानसभा मतदारसंघात उत्साहाचे वातावरण निर्माण झाले आहे. भाजपा प्रदेशाध्यक्ष रवींद्र चव्हाण यांच्या संकल्पनेतून उद्या सावंतवाडी विधानसभा मतदारसंघातील कार्यकर्त्यांच्या घरांवर, मंडल, बूथ आणि शक्ती केंद्र कार्यालयांवर हजारोंच्या संख्येने भारतीय जनता पार्टीचे ध्वज फडकवले जाणार आहेत. या पार्श्वभूमीवर, स्थापना दिनाच्या पूर्वसंध्येला आज सावंतवाडी येथील भाजपा संपर्क कार्यालयात भाजपा महाराष्ट्रचे युवा नेते विशालजी परब यांच्या शुभहस्ते ‘भाजपा ध्वज वाटप अभियान’ जोरदारपणे राबवण्यात आले.
६ एप्रिल २०२६ रोजी होत असलेला भाजपाचा स्थापना दिन हा कार्यकर्त्यांपासून ते सर्वसामान्य जनतेपर्यंत सर्वांसाठी अत्यंत आनंद आणि अभिमानाचा सोहळा ठरत आहे. आज जगातील सर्वात मोठा राजकीय पक्ष ठरलेल्या भारतीय जनता पार्टीचा वर्धापन दिन देशाच्या कानाकोपऱ्यात साजरा होत असताना, सावंतवाडीतही त्याचे जय्यत नियोजन करण्यात आले आहे. आज झालेल्या कार्यक्रमात विशालजी परब यांच्या हस्ते कार्यकर्त्यांना भाजपच्या ध्वजांचे वाटप करण्यात आले. यावेळी भाजपाचे अनेक पदाधिकारी आणि कार्यकर्ते मोठ्या संख्येने उपस्थित होते.
या प्रसंगी बोलताना विशाल परब यांनी सांगितले की, उद्या स्थापना दिनानिमित्त सावंतवाडी विधानसभा मतदारसंघातील हजारो घरांवर भाजपाचे ध्वज डौलाने फडकतील आणि संपूर्ण वातावरण भाजपामय होईल. उद्या होणाऱ्या मुख्य सोहळ्याचा उत्साह आजच्या या ध्वज वाटप कार्यक्रमातच स्पष्टपणे दिसून आला असून, घराघरांत भगवा ध्वज पोहोचवून पक्ष संघटना अधिक मजबूत करण्याचा निर्धार यावेळी कार्यकर्त्यांनी व्यक्त केला.
