सिंधुदुर्ग,दि.१२: सावंतवाडी आणि कुडाळ या दोन तालुक्यांना जोडणारा अत्यंत महत्त्वाचा कलंबिस्त–शिरशिंगे–शिवापूर घाटमाथा रस्ता आता लवकरच पूर्णत्वाकडे जाणार आहे. या रस्त्याच्या कामात वनविभागाच्या जमिनी संदर्भात असलेल्या प्रशासकीय अडचणी सोडवण्यासाठी नुकतीच एक महत्त्वाची बैठक पार पडली. या बैठकीनंतर जमिनीची आवश्यक वर्गवारी पूर्ण झाली असून, रस्त्यासाठी लागणाऱ्या पर्यायी जमिनीचा सातबारा वनविभागाच्या नावावर करण्यात आला आहे. यामुळे गेल्या अनेक काळापासून प्रलंबित असलेल्या या मार्गाचा अडथळा आता पूर्णपणे दूर झाला असून कामाचा मार्ग मोकळा झाला आहे.
हा महत्त्वाचा प्रश्न मार्गी लावण्यासाठी कुडाळ पंचायत समितीचे माजी सभापती मोहन सावंत, सार्वजनिक बांधकाम विभागाचे शाखा अभियंता लोहार, शिरशिंगे गावचे शिवसेना उपतालुका प्रमुख जीवन लाड, उद्योजक अरुणभाई गुंजाळ, मुख्याध्यापक मनोज शेडगे आणि जीएसटी विभागाच्या असिस्टंट कमिशनर सौ. मानसी शेडगे यांनी विशेष पुढाकार घेतला होता. त्यांच्या प्रयत्नातून कोल्हापूर जिल्ह्यातील शाहूवाडी तालुक्याच्या तहसीलदार श्रीमती सोनवणे यांची भेट घेण्यात आली आणि जमिनीच्या हस्तांतरणाची प्रक्रिया तांत्रिकदृष्ट्या पूर्ण करण्यात आली.
या रस्त्यासाठी माजी केंद्रीय मंत्री नारायण राणे, सिंधुदुर्ग जिल्ह्याचे पालकमंत्री नितेश राणे, आमदार निलेश राणे तसेच तत्कालीन कोल्हापूर जिल्ह्याचे पालकमंत्री दीपकभाई केसरकर यांचे मोलाचे सहकार्य लाभले आहे. लोकप्रतिनिधींच्या सातत्यपूर्ण पाठपुराव्यामुळेच या प्रकल्पातील प्रशासकीय अडथळे दूर होऊ शकले आहेत. सावंतवाडी आणि कुडाळ या दोन तालुक्यांना जोडणारा हा घाटमाथ्यावरील रस्ता पूर्ण झाल्यास शिरशिंगे, शिवापूर आणि परिसरातील गावांच्या दळणवळणाला मोठी चालना मिळणार आहे. हा रस्ता स्थानिक ग्रामस्थांच्या जीवनात विकासाचा नवा टप्पा ठरेल, असा विश्वास व्यक्त केला जात आहे.
