सावंतवाडी,दि.२५: अभिजात मराठी साहित्याचे मानदंड वि. वा. शिरवाडकर उर्फ कुसुमाग्रज यांच्या जयंती निमित्त राज्यभरात ‘मराठी भाषा गौरव दिन’ मोठ्या उत्साहात साजरा केला जातो. याच दिनाचे औचित्य साधून कोकण मराठी साहित्य परिषद, शाखा- सावंतवाडी व स्टेपिंग स्टोन ग्लोबल स्कूल यांच्या संयुक्त विद्यमाने कोलगाव येथे विशेष कार्यक्रमाचे आयोजन करण्यात आले आहे. मराठी भाषेची समृद्धी आणि कुसुमाग्रजांच्या साहित्यातील योगदानाचा जागर या निमित्ताने केला जाणार आहे.
शुक्रवार, २७ फेब्रुवारी रोजी सकाळी ८:४५ वाजता भव्य ग्रंथदिंडीने या सोहळ्याचा प्रारंभ होणार असून, या दिंडीनंतर मान्यवरांच्या हस्ते बाल साहित्य प्रदर्शनाचे उद्घाटन करण्यात येईल. या सोहळ्याला प्रमुख अतिथी म्हणून प्रांताधिकारी समीर घारे उपस्थित राहणार असून कार्यक्रमाचे अध्यक्षस्थान कोमसाप जिल्हाध्यक्ष मंगेश मसके भूषविणार आहेत.
यावेळी ज्येष्ठ मालवणी कवी दादा मडकईकर, स्टेपिंग स्टोन ग्लोबल स्कूलचे संचालक ॲड. रूजूल पाटणकर, कोमसाप सावंतवाडी अध्यक्ष दीपक पटेकर, ज्येष्ठ साहित्यिका उषा परब आणि कोमसाप जिल्हा सचिव ॲड. संतोष सावंत यांसारख्या मान्यवरांची प्रमुख उपस्थिती लाभणार आहे. मराठी भाषेचा गौरव करणाऱ्या या कार्यक्रमात शालेय चिमुकल्यांची सादरीकरणे हे विशेष आकर्षण असणार आहेत. या सोहळ्यास सर्व भाषाप्रेमींनी मोठ्या संख्येने उपस्थित राहावे, असे आवाहन कोमसाप शाखा सावंतवाडीच्या वतीने करण्यात आले आहे.
