सावंतवाडी,दि.२५: सावंतवाडी शहर पोलिसांनी ‘खाकी’ वर्दीतील माणुसकीचे दर्शन घडवत एका ७० वर्षीय वृद्धाला सुरक्षितपणे त्यांच्या कुटुंबीयांच्या स्वाधीन केले आहे. सावंतवाडी बाजारपेठ येथील आरपीडी रोडवरील साई मंदिर परिसरात गेल्या दोन दिवसांपासून एक वयस्कर व्यक्ती रस्त्याच्या कडेला हतबल स्थितीत आढळून आली होती. वाढत्या वयामुळे या वृद्धाला नीट बोलता येत नव्हते, मात्र त्यांच्याकडे असलेल्या आधार कार्डमुळे त्यांची ओळख पटली. तुकाराम कृष्णा म्हापणकर (वय ७०) असे या वृद्धाचे नाव असून ते घावनळे खुटवळवाडी येथील रहिवासी असल्याचे समजले.
या घटनेची माहिती मिळताच सावंतवाडी पोलीस निरीक्षक अमोल चव्हाण यांनी तत्काळ दखल घेतली. त्यांच्या मार्गदर्शनाखाली पोलीस हवालदार महेश जाधव आणि भूषण भोवर यांनी सदर वृद्धाला त्यांच्या घरी नेण्याची व्यवस्था केली. पोलिसांनी घावनळे येथे जात स्थानिक पोलीस पाटील तोरसकर यांच्या समक्ष श्री. म्हापणकर यांना त्यांचा पुतण्या राजन म्हापणकर यांच्या स्वाधीन केले. दोन दिवस बेपत्ता असलेले काका सुखरूप घरी परतल्याने नातेवाईकांनी पोलिसांचे आभार मानले आहेत. पोलिसांच्या या तत्परतेमुळे आणि सामाजिक बांधिलकीमुळे सर्व स्तरातून त्यांचे कौतुक होत आहे.
