‘इतिहासाची साधने – अनुभवातून ज्ञानाकडे’ उपक्रमाची राज्यस्तरावर मोहोर; शैक्षणिक क्षेत्रातून अभिनंदनाचा वर्षाव
सिंधुदुर्ग,दि.२५: राज्य शैक्षणिक संशोधन व प्रशिक्षण परिषद (SCERT), महाराष्ट्र, पुणे यांच्या वतीने आयोजित राज्यस्तरीय नवोपक्रम स्पर्धा सन २०२५-२६ चा निकाल नुकताच जाहीर झाला असून, यात प्राथमिक गटातील पूर्व माध्यमिक स्तर (इयत्ता ६ वी ते ८ वी) विभागात गणेश भिकाजी नाईक यांनी उल्लेखनीय यश संपादन केले आहे. त्यांनी सादर केलेल्या ‘इतिहासाची साधने – अनुभवातून ज्ञानाकडे’ या नाविन्यपूर्ण उपक्रमाला राज्यस्तरावर तृतीय क्रमांकाने गौरवण्यात आले आहे. त्यांच्या या यशामुळे सिंधुदुर्ग जिल्ह्याच्या शैक्षणिक शिरपेचात मानाचा तुरा रोवला गेला आहे.
राज्यातील शिक्षकांच्या अध्यापनात नाविन्यता वाढवणे, शैक्षणिक समस्या सोडवण्यासाठी सृजनशील उपक्रमांना प्रोत्साहन देणे तसेच विद्यार्थ्यांच्या गुणवत्तापूर्ण शिक्षणासाठी नवे प्रयोग पुढे आणणे हा या स्पर्धेचा मुख्य उद्देश आहे. गणेश नाईक यांनी आपल्या उपक्रमात पारंपरिक पाठांतर पद्धतीला फाटा देत विद्यार्थ्यांना इतिहासातील साधने प्रत्यक्ष अनुभव, निरीक्षण, प्रात्यक्षिके, प्रकल्पकार्य व चर्चासत्रांद्वारे समजावून सांगितली. या अनुभवाधारित व कृतीशील शिक्षणपद्धतीमुळे विद्यार्थ्यांमध्ये इतिहास विषयाबद्दल विशेष रुची निर्माण झाली असून, त्यांची निरीक्षण क्षमता आणि विश्लेषणात्मक विचारशक्ती वाढल्याचे दिसून आले आहे.
विशेष कौतुकाची बाब म्हणजे गणेश भिकाजी नाईक यांनी सलग तिसऱ्या वर्षी या स्पर्धेत यश मिळवून आपली गुणवत्ता सिद्ध केली आहे. त्यांच्या या यशाबद्दल जिल्हा शिक्षण व प्रशिक्षण संस्था (डाएट) सिंधुदुर्गचे प्राचार्य राजेंद्र कांबळे, मार्गदर्शक डॉ. संदिप पवार, शाळेचे उच्चश्रेणी मुख्याध्यापक अजित तांबे, सहकारी शिक्षक व शाळा व्यवस्थापन समिती यांच्याकडून त्यांचे विशेष अभिनंदन करण्यात आले आहे. शिक्षण क्षेत्रातील या गौरवपूर्ण कामगिरीबद्दल नाईक यांच्यावर सर्वस्तरातून कौतुकाचा वर्षाव होत आहे.
