वैभववाडी,दि.२५: ह्युमन राईट असोसिएशन फॉर प्रोटेक्शन विभाग (सिंधुदुर्ग), एकदंत फूड अँड बेवरेजेस (ओरबेलो) आणि सिंधू रक्तमित्र प्रतिष्ठान (वैभववाडी) यांच्या संयुक्त विद्यमानाने कै. सौ. शिला शंतनू बांदिवकडेकर यांच्या तृतीय स्मृतिदिनाचे औचित्य साधून शनिवार, दि. १४ फेब्रुवारी २०२६ रोजी भव्य रक्तदान शिबिर व मोफत आरोग्य तपासणी शिबिराचे आयोजन करण्यात आले होते. सामाजिक बांधिलकी जपणारा हा उपक्रम अत्यंत उत्साहपूर्ण आणि प्रेरणादायी वातावरणात पार पडला.
या शिबिराचे खास वैशिष्ट्य म्हणजे यावेळी तरुण कलागुणांचा सन्मान करण्यात आला. उत्कृष्ट चित्रकार आणि दशावतारी नाट्य कलावंत म्हणून कु. श्रुती संतोष सुतार हिने आपल्या कलेच्या माध्यमातून उमटवलेल्या ठशाची दखल घेत, लोककलेतील दिग्गज व्यक्तिमत्व मा. श्री. परशुराम ‘पद्मश्री’ गंगावणे यांच्या शुभहस्ते तिला सन्मानचिन्ह व पुष्पगुच्छ देऊन गौरविण्यात आले. यावेळी उपस्थितांनी श्रुतीच्या कलाप्रवासाचे टाळ्यांच्या कडकडाटात कौतुक केले.
या कार्यक्रमाला पद्मश्री परशुराम गंगावणे यांच्यासोबतच वैभववाडी पंचायत समितीचे सभापती मा. श्री. बापी मांजरेकर, सिंधू रक्तमित्र प्रतिष्ठानचे संस्थापक अध्यक्ष श्री. प्रकाश तेंडोलकर, तसेच विविध तज्ञ डॉक्टर आणि परिचारिका उपस्थित होत्या. याप्रसंगी मानवाधिकार संघटनेचे पदाधिकारी व स्थानिक ग्रामस्थांनी मोठ्या संख्येने उपस्थित राहून या आरोग्यदायी उपक्रमाला प्रतिसाद दिला. रक्तदात्यांच्या उत्स्फूर्त सहभागामुळे आणि मान्यवरांच्या मार्गदर्शनामुळे हा स्मृतिदिनाचा कार्यक्रम खऱ्या अर्थाने समाजासाठी उपयुक्त ठरला.
