मंत्री नितेश राणे यांच्या नेतृत्वाखाली भाजप प्रवेशाचा ओघ सुरू
वैभववाडी,दि.२६: तालुक्यातील कोकिसरे बांधवाडी, गडमठ, लोरे नं. २ आणि नापणे परिसरातील उद्धव बाळासाहेब ठाकरे (उबाठा) पक्षाचे असंख्य पदाधिकारी आणि शिवसैनिकांनी पालकमंत्री नितेश राणे यांच्या उपस्थितीत भारतीय जनता पार्टीत (भाजपा) जाहीर पक्षप्रवेश केला.
कोकिसरे येथील माजी सरपंच राजाराम गडकर यांच्यासह अनेक शिवसैनिक भाजपत दाखल झाल्याने, कोकिसरे गावातून उबाठा पक्षाचे समूळ उच्चाटन झाल्याची जोरदार चर्चा सुरू झाली आहे. यासोबतच, नापणे येथील तालुका खरेदी विक्री संघाचे संचालक, ग्रामपंचायत सदस्य व सोसायटी सदस्य पांडुरंग पाटील यांच्या पक्षप्रवेशाने सुद्धा उबाठा गटाला मोठा धक्का बसला आहे.
काही दिवसांपूर्वीच माजी पंचायत समिती सदस्य मंगेश लोके यांनी भाजपमध्ये प्रवेश केला होता. त्यांच्या प्रवेशानंतर उबाठा पक्षात उरलीसुरली ताकद नसल्याचे दिसत असतानाच, आता राणे यांच्या नेतृत्वाखाली दररोज कार्यकर्ते भाजपत दाखल होत आहेत. या नव्या प्रवेशांमुळे वैभववाडीत उबाठा पक्ष पूर्णपणे गारद झाल्याचे राजकीय वर्तुळात म्हटले जात आहे.
यावेळी भाजपमध्ये प्रवेश केलेल्यांमध्ये माजी शाखाप्रमुख विलास कदम, माजी शाखाप्रमुख विजय मसुरकर, युवासेना प्रमुख नागेश आडके, राजाराम आडके, जयेंद्र कुळी, तुषार घाडी, दीपक कदम, नितीन सावंत, जयवंत साटम, सत्यवान साटम, देविदास नार्वेकर, विजय कदम, संतोष कदम, राजेंद्र आडके, संदीप आडके, गणेश आडके, सदानंद साटम, शंकर कदम, दिनकर कदम, अंकुश लाड, दत्ताराम कुळी, राजाराम गडकर, प्रकाश आमरसकर, प्रकाश विटेकर, प्रकाश पर्वते, चंद्रकांत गवाळे, तसेच लोरे नं.२ येथील बुथ प्रमुख नारायण म्हदेव आणि नापणे येथील पांडुरंग पाटील यांच्यासह असंख्य उबाठा कार्यकर्त्यांनी भारतीय जनता पार्टीचा झेंडा हाती घेतला.
या पक्षप्रवेशानंतर तालुक्यात उबाठाचा पत्ताच उरला नसल्याचा दावा भाजप कार्यकर्त्यांनी केला आहे. यावेळी भारतीय जनता पार्टीचे बँक संचालक दिलीप रावराणे, माजी सभापती बंड्या मांजरेकर, मंगेश लोके, किशोर कांबळे, बंटी रावराणे, उमेश पवार आदी भाजप पदाधिकारी उपस्थित होते.
