शेर्ले दुकानवाडी-कापई जुना पूल रस्ता बनला अपघाताचा सापळा; लाखो रुपयांचा खर्च पाण्यात, नागरिकांमध्ये तीव्र संताप

सार्वजनिक बांधकाम विभागाच्या दुर्लक्षामुळे प्रवाशांचा जीव धोक्यात; रस्ता सुकर करण्याची सामाजिक कार्यकर्त्यांची मागणी

सावंतवाडी,दि.०४: सार्वजनिक बांधकाम विभागाने लाखो रुपये खर्च करून शेर्ले दुकानवाडी ते कापई (जुना) पूल या रस्त्याची डागडुजी केली खरी, मात्र या कामाच्या दर्जाबाबत आता गंभीर प्रश्नचिन्ह निर्माण झाले आहे. रस्त्याची दुरुस्ती करताना साईड पट्टीसाठी टाकण्यात आलेली माती थेट मुख्य रस्त्यावरच पसरली आहे. यामुळे वाहनचालकांना या मार्गावरून प्रवास करताना मोठा अडथळा निर्माण होत असून, वाहने घसरून अपघात होण्याचा धोका कमालीचा वाढला आहे. लाखो रुपये खर्च करूनही रस्ता अद्याप सुरक्षित आणि सुकर न झाल्याने स्थानिक नागरिकांमधून प्रशासनाविरोधात तीव्र संताप व्यक्त केला जात आहे.
ब्रिटीशकालीन असलेला शेकडो वर्षे जुना कापई पूल उंचीने अत्यंत कमी असल्यामुळे पावसाळ्यात या पुलावर वारंवार पाणी येत असे. परिणामी, बांदा–शिरोडा मार्गावरील वाहतूक अनेकदा पूर्णपणे ठप्प होत होती. या समस्येवर तोडगा काढण्यासाठी नागरिकांनी सातत्यपूर्ण मागणी लावून धरली होती, ज्याची दखल घेत प्रशासनाने या ठिकाणी पर्यायी नवीन पूल उभारला. मात्र, नवीन पुलावरून वाहतूक सुरू झाल्यानंतर संबंधित विभाग जुन्या पुलाकडे आणि त्या जोडणाऱ्या रस्त्याकडे पूर्णपणे दुर्लक्ष करू लागला. अनेक वर्षे या मार्गावरील वाहतूक बंद राहिल्यामुळे रस्त्याच्या दुतर्फा आता मोठ्या प्रमाणात झाडे-झुडपे वाढली आहेत. यामुळे पूर्वीचा रुंद रस्ता कमालीचा अरुंद झाला असून, समोरून येणाऱ्या वाहनांना मार्ग काढताना वाहनचालकांना मोठी कसरत करावी लागत आहे.
दोन वर्षांपूर्वी सार्वजनिक बांधकाम विभागाने या जुन्या रस्त्याची लाखो रुपये खर्चून डागडुजी केली होती. मात्र, हे काम पूर्ण होऊनही रस्त्याच्या कडेला वाढलेली झाडे-झुडपे अद्याप हटविण्यात आलेली नाहीत. त्यातच साईड पट्टीसाठी आणलेली माती रस्त्यावरच पसरलेल्या स्थितीत पडून राहिल्याने वाहनचालकांना मनस्ताप सहन करावा लागत आहे. या पार्श्वभूमीवर, सामाजिक कार्यकर्ते महेश उर्फ पप्पू खोबरेकर, ग्रामपंचायत सदस्य बाळा शेर्लेकर आणि विक्रांत नेवगी यांनी सार्वजनिक बांधकाम विभागाने या प्रकरणात तातडीने लक्ष घालण्याची मागणी केली आहे. रस्त्यावरील पसरलेली माती त्वरित हटवून आणि दुतर्फा वाढलेली झाडे-झुडपे कापून हा मार्ग वाहनचालकांसाठी सुरक्षित व सुरळीत करावा, अशी आग्रही मागणी या पदाधिकाऱ्यांनी केली आहे.