उभाबाजार बाल गोपाल मित्र मंडळाचा उपक्रम; शनिवारी खुल्या रेकॉर्ड डान्स स्पर्धेची मेजवानी
सावंतवाडी,दि.१२: दिवाळीच्या मंगलमय पर्वानिमित्त सावंतवाडी शहरात प्रथमच उभाबाजार बाल गोपाल मित्र मंडळाच्या वतीने भव्य ‘फन फेअर’चे आयोजन करण्यात आले आहे. शुक्रवार, १३ ते रविवार, १५ नोव्हेंबर या तीन दिवसांच्या कालावधीत उभाबाजार परिसरात हा उत्सव भरणार असून, या निमित्ताने खवय्ये आणि लहान मुलांसाठी मनोरंजनाची मोठी पर्वणी उपलब्ध झाली आहे. या फन फेअरचे उद्घाटन शुक्रवार सायंकाळी संपन्न होणार आहे.
उभाबाजार येथील हनुमान मंदिरापासून ते छत्रपती शिवाजी महाराज यांच्या पुतळ्यापर्यंतच्या परिसरात हा फन फेअर सजणार आहे. या ठिकाणी विविध चमचमीत खाद्यपदार्थांची मेजवानी आणि लहान मुलांसाठी आकर्षक खेळांचे स्टॉल्स उभारण्यात येणार आहेत. तसेच, या महोत्सवाचे मुख्य आकर्षण म्हणून शनिवार, १४ नोव्हेंबर रोजी सायंकाळी ७ वाजता ‘खुली रेकॉर्ड डान्स स्पर्धा’ आयोजित करण्यात आली आहे. तब्बल तीन दिवस चालणाऱ्या या उपक्रमाचा सावंतवाडी शहरातील सर्व नागरिकांनी सहकुटुंब आनंद घ्यावा आणि स्टॉल्सचा आस्वाद घ्यावा, असे आवाहन उभाबाजार बाल गोपाल मित्र मंडळाच्या वतीने करण्यात आले आहे.