स्वर, ताल अन् भक्तीच्या त्रिवेणी संगमाने सावंतवाडीत रंगली ‘दिवाळी पहाट’

महाराष्ट्र शासनाच्या ‘सुरमयी दिवाळी पहाट’ सोहळ्यास रसिकांचा उत्स्फूर्त प्रतिसाद; संगीत व नाट्यपरंपरेचा वारसा जपणे हेच उद्दिष्ट : आमदार दीपक केसरकर

सावंतवाडी,दि.१०: पहाटेच्या प्रसन्न आणि मंगलमय वातावरणात उमटलेले भक्तिसंगीताचे मंजूळ सूर, नाट्यसंगीताची भावस्पर्शी लय आणि लोकप्रिय मराठी गीतांच्या सुरेल वर्षावाने सावंतवाडीकरांची दिवाळीची पहाट संगीतमय ठरली. महाराष्ट्र शासनाच्या सांस्कृतिक कार्य विभागाच्या वतीने आयोजित ‘सुरमयी दिवाळी पहाट’ या भव्य संगीत सोहळ्याला स्थानिक रसिकांनी उदंड प्रतिसाद दिला. संगीताच्या सुरावटींतून सांस्कृतिक परंपरेचा समृद्ध वारसा जपत या कार्यक्रमाने सावंतवाडीच्या कलासंपन्न भूमीचा गौरव पुन्हा एकदा अधोरेखित केला.

या सोहळ्याचे उद्घाटन करताना माजी शिक्षणमंत्री तथा स्थानिक आमदार दीपक केसरकर यांनी सावंतवाडी ही सिंधुदुर्ग जिल्ह्याची सांस्कृतिक राजधानी असून येथील संपन्न नाटक आणि संगीताची परंपरा निरंतर टिकवून ठेवणे हेच आपले मुख्य उद्दिष्ट असल्याचे प्रतिपादन केले. सांस्कृतिक कार्य विभागाने या दर्जेदार कार्यक्रमाचे आयोजन सावंतवाडीत केल्याबद्दल त्यांनी सांस्कृतिक कार्यमंत्री ॲड. आशिष शेलार यांचे विशेष आभार मानले. शेलार हे सावंतवाडीचे जावई असल्याचा अभिमान व्यक्त करत, केसरकर यांनी आपल्या कुटुंबाच्या नाट्यचळवळीतील योगदानाच्या आठवणींना उजाळा दिला. सावंतवाडीतील संगीत चळवळ आजही सद्गुरू संगीत विद्यालयाच्या माध्यमातून अत्यंत प्रवाही असून गुरुवर्य निलेश मेस्त्री, किशोर सावंत आणि बाळ पुराणिक यांचे योगदान कौतुकास्पद असल्याचे त्यांनी नमूद केले. तसेच, नगराध्यक्ष असताना २१ वर्षांपूर्वी सुरू केलेली ‘पाडवा पहाट’ परंपरा आजही अविरतपणे सुरू असल्याचा अभिमान व्यक्त करत त्यांनी राज्य शासनाचे आभार मानले.

कार्यक्रमाच्या प्रारंभी माजी नगराध्यक्ष संजू परब यांच्या हस्ते संगीत क्षेत्रातील उल्लेखनीय योगदानाबद्दल गुरुवर्य निलेश मेस्त्री यांचा यथोचित सत्कार करण्यात आला. त्यानंतर रंगलेल्या मुख्य संगीत मैफलीचे समर्थ संयोजन किशोर सावंत यांनी केले, तर निलेश मेस्त्री यांनी हार्मोनियमवर साथसंगत केली. युवा तबलावादक निरज भोसले, अश्विन जाधव आणि मंगेश मेस्त्री यांच्या तालवादनाने मैफलीत अनोखा रंग भरला. गायक नितीन धामापूरकर, गायिका वर्षा देवण, केतकी सावंत, समृद्धी सावंत आणि ॲड. सिद्धी परब यांनी सादर केलेल्या नाट्यसंगीत, भक्तिगीते आणि मराठी सुरावटींनी उपस्थितांना मंत्रमुग्ध केले. या अविस्मरणीय सादरीकरणाला रसिकांनी भरभरून दाद दिली.

या संगीत सोहळ्यास सावंतवाडी नगरपरिषदेच्या महिला व बालकल्याण सभापती दिपाली भालेकर, नगरसेविका शर्वरी धारगळकर, स्नेहा नाईक, निवृत्त शिक्षक म. ल. देसाई, भरत गावडे, दीपक पटेकर, सामाजिक कार्यकर्ते दिलीप भालेकर, ॲड. नकुल पार्सेकर, नायब तहसीलदार सविता कासकर, समन्वयक आर्यन देसाई, प्रा. प्रतिभा चव्हाण, मालवणी कवी दादा मडकईकर, सुधीर धुमे, कौस्तुभ पेडणेकर आदी मान्यवर व संगीतप्रेमी मोठ्या संख्येने उपस्थित होते. कार्यक्रमाचे प्रास्ताविक नायब तहसीलदार सविता कासकर – तारी यांनी केले, ओघवते सूत्रसंचालन प्रा. रूपेश पाटील यांनी तर आभार प्रदर्शन आर्यन देसाई यांनी केले. कोवळ्या उन्हात स्वरांची उधळण करणारा हा सोहळा सावंतवाडीच्या समृद्ध वारशाला नवी झळाळी देणारा सांस्कृतिक जागर ठरला.