पुस्तकी ज्ञानापलीकडे जाऊन कृतीतून दिला पर्यावरण रक्षणाचा धडा; सावंतवाडी परिसरात उपक्रमाचे मोठे कौतुक
सावंतवाडी,दि.१७: पावसाचे वाहून जाणारे पाणी अडवून भूजल पातळी वाढवण्यासाठी आणि निसर्ग संवर्धनाचा प्रत्यक्ष संदेश देण्यासाठी येथील मिलाग्रीस हायस्कूलच्या विद्यार्थ्यांनी एक आदर्शवत पाऊल उचलले आहे. प्रशालेच्या स्काऊट गाईड आणि इको क्लबच्या वतीने आज राबवण्यात आलेल्या विशेष श्रमदान मोहिमेअंतर्गत शाळेच्या परिसरात एक भक्कम बंधारा यशस्वीरीत्या बांधण्यात आला. केवळ पुस्तकी ज्ञानावर अवलंबून न राहता प्रत्यक्ष कृतीतून पर्यावरण रक्षणाचा धडा देणाऱ्या या उपक्रमाचे सावंतवाडी शहरासह संपूर्ण परिसरातून उत्स्फूर्त कौतुक होत आहे.
प्रशालेच्या बागेकडील पुलाजवळ आज सकाळपासूनच विद्यार्थी आणि शिक्षकांच्या उपस्थितीत उत्साहाचे वातावरण पाहायला मिळाले. या श्रमदानात इयत्ता आठवीतील स्काऊट गाईडचे विद्यार्थी आणि इको क्लबच्या सदस्यांनी हिरिरीने सहभाग नोंदवला. हातामध्ये टिकाव, फावडे घेऊन विद्यार्थ्यांनी स्वतः माती आणि स्थानिक दगडांची सुनियोजित जुळवाजुळव करत हा बंधारा उभा केला. पावसाचे वाया जाणारे पाणी अडवून ते जमिनीत मुरवणे, विहिरींची जलपातळी वाढवणे आणि जमिनीची धूप थांबवणे हा या उपक्रमामागील मुख्य उद्देश होता.
या सामाजिक आणि पर्यावरणपूरक उपक्रमाचे नेतृत्व व मार्गदर्शन प्रशालेचे मुख्याध्यापक फादर रिचर्ड सालढाणा यांनी केले. बंधारा निर्मितीच्या या मोहिमेदरम्यान स्काऊट गाईड ओरोसचे प्रमुख पदाधिकारी विशेषत्वाने उपस्थित होते. त्यांच्या मार्गदर्शनाखाली आणि शिक्षकांच्या सहकार्यामुळे काम अत्यंत नियोजनबद्ध पद्धतीने पार पडले. विद्यार्थ्यांनी दाखवलेली एकी, श्रमदानाची तयारी आणि सामाजिक बांधिलकी यामुळे परिसरात जलजागृतीचा एक नवा आदर्श निर्माण झाला असून शाळा प्रशासनाने घेतलेल्या या पुढाकाराचे सर्व स्तरांतून अभिनंदन केले जात आहे.