भाजप युवा मोर्चा व मराठा ऐक्यवर्धक मंडळाचा विधायक उपक्रम; नागरिकांचा उत्स्फूर्त प्रतिसाद
सावंतवाडी, दि.१६: वाढदिवसाच्या निमित्ताने होणारा पुष्पगुच्छ, सत्कार आणि फलकबाजीचा अनावश्यक खर्च टाळून ‘ना बुके, ना पोस्टर; बळीराजाच्या सक्षमीकरणासाठी योगदान!’ हा कृतिशील विचार प्रत्यक्षात उतरवत भाजप युवा नेते विशाल परब यांच्या वाढदिवसानिमित्त सावंतवाडी विधानसभा मतदारसंघात आरोग्यसेवा आणि जलसंधारणाचे उपक्रम हाती घेण्यात आले आहेत. पंतप्रधान नरेंद्र मोदी व भाजप प्रदेशाध्यक्ष रवींद्र चव्हाण यांच्या वाढदिवसानिमित्त पालकमंत्री नितेश राणे यांच्या मार्गदर्शनाखाली राबवलेल्या सेवा अभियानाचा पुढील टप्पा म्हणून या विधायक उपक्रमांची आखणी करण्यात आली असून, तळवडे येथे आयोजित महाआरोग्य शिबिराला परिसरातील नागरिकांचा उत्स्फूर्त प्रतिसाद लाभला.
ग्रामीण व दुर्गम भागातील नागरिकांना गावातच दर्जेदार वैद्यकीय तपासणी आणि उपचार उपलब्ध व्हावेत, या हेतूने विविध जिल्हा परिषद मतदारसंघांत ही शिबिरे राबवण्यात येत आहेत. तळवडे येथे मराठा समाज ऐक्यवर्धक मंडळाच्या सहकार्याने पार पडलेल्या या शिबिराचे उद्घाटन सावंतवाडीचे उपनगराध्यक्ष ॲड. अनिल निरवडेकर यांच्या हस्ते करण्यात आले. वाढदिवसाचा खर्च टाळून त्या माध्यमातून लोकसहभागातून कच्चे बंधारे बांधणे आणि महाआरोग्य शिबिरे घेणे, या दुहेरी संकल्पनेतून शेतकरी, कष्टकरी आणि सर्वसामान्यांच्या हिताला प्राधान्य दिले जात असल्याचे यावेळी उपस्थितांनी नमूद केले. तळवडे परिसरातील बहुसंख्य नागरिकांनी या आरोग्य शिबिराचा प्रत्यक्ष लाभ घेतला.
या उद्घाटन सोहळ्याच्या व्यासपीठावर सावंतवाडीचे उपनगराध्यक्ष ॲड. अनिल निरवडेकर, युवा नेते विशाल परब, माजी पंचायत समिती सभापती पंकज पेडणेकर, निरवडेचे माजी सरपंच हरी वारंग, बाळा तळकर, सामाजिक कार्यकर्ते नारायण ऊर्फ बाळा जाधव, आप्पा परब, सुहास पिकुळकर, अण्णा मालवणकर, लवू परब, शाम कुंभार, विकास गावडे, नम्रता गावडे, मंगलदास पेडणेकर, स्मिता परब, प्रवीण लोके, सुशांत गावडे, ग्रामविकास अधिकारी सद्गुरू गावडे, शंकर सावंत, बाळा भगत, शाम शेटकर यांसह स्थानिक पदाधिकारी, कार्यकर्ते व नागरिक मोठ्या संख्येने उपस्थित होते.
