पंतप्रधान मोदींच्या वाढदिवसानिमित्त सेवा संकल्प; विशाल परब यांच्या वाढदिवसाचे औचित्य साधून हजारो रुग्णांची मोफत तपासणी
सावंतवाडी,दि.१६ : पंतप्रधान नरेंद्र मोदी यांच्या वाढदिवसानिमित्त देशभरात राबवण्यात आलेल्या ‘सेवा संकल्प’ अभियानांतर्गत तसेच भाजप प्रदेशाध्यक्ष रवींद्र चव्हाण व पालकमंत्री नितेश राणे यांच्या मार्गदर्शनाखाली, भाजप युवा नेते विशाल परब यांच्या वाढदिवसाचे औचित्य साधून सावंतवाडी येथील जिमखाना मैदानावर भव्य ‘महाआरोग्य शिबिरा’चे आयोजन करण्यात आले. भाजप सिंधुदुर्ग आणि सह्याद्री फाउंडेशनच्या संयुक्त विद्यमाने आयोजित या शिबिराचे उद्घाटन भाजप महाराष्ट्र सहप्रभारी खासदार सदानंदशेठ तानावडे यांच्या हस्ते करण्यात आले. याप्रसंगी बोलताना खा. तानावडे यांनी, सिंधुदुर्ग जिल्ह्यातील सध्याची परिस्थिती पाहता कोणताही खर्चिक कार्यक्रम न करता ‘बुकेऐवजी बंधारा आणि पोस्टरऐवजी आरोग्य शिबीर’ हा स्तुत्य संदेश देऊन विशाल परब यांनी सामाजिक बांधिलकी जपल्याचे नमूद केले. तसेच नरेंद्र मोदी यांचे ‘विकसित भारत’ हे व्हिजन आणि अंत्योदयाचे तत्त्व घेऊन परब सातत्याने कार्यरत असल्याचे सांगत त्यांनी परब यांना वाढदिवसाच्या शुभेच्छा दिल्या.
कार्यक्रमाच्या सुरुवातीला आयुष हॉस्पिटलचे संचालक अनंत सरनाईक यांनी विशाल परब यांना कोल्हापुरी फेटा परिधान करून सन्मानित केले, तर महिला शहराध्यक्षा मोहिनी मडगावकर व पदाधिकाऱ्यांनी वृक्ष भेट देऊन शुभेच्छा दिल्या. याप्रसंगी मनोगत व्यक्त करताना विशाल परब यांनी सांगितले की, मतदारसंघातील १७ जिल्हा परिषद गट आणि ३ शहरांमध्ये महाआरोग्य शिबिरे व बंधारे बांधण्याचे काम सुरू आहे. केवळ तात्पुरते शिबिर न ठेवता सावंतवाडीतील जनसंपर्क कार्यालयात दर मंगळवारी कायमस्वरूपी ओपीडी सुरू करण्यात येणार असून, त्याद्वारे नामांकित रुग्णालयांच्या सेवा नियमितपणे गरजूंना उपलब्ध करून दिल्या जातील. आपण राजकारणात कोणालाही शत्रू मानत नसून वर्षाचे बाराही महिने १६४ गावांतील गोरगरीब जनतेची सेवा करणे हेच आपले ध्येय असल्याचे त्यांनी स्पष्ट केले.
या शिबिरात बाहेरील नामवंत वैद्यकीय तज्ज्ञांचा मोठा सहभाग लाभला. बेळगाव येथील सुप्रसिद्ध केएलई रुग्णालयाची ९२ जणांची टीम, पुण्यातील रुबी, दीनानाथ मंगेशकर, ज्युपिटर, लोकमान्य तसेच कोल्हापूरच्या अथायू रुग्णालयातील डॉक्टरांनी रुग्णांची मोफत तपासणी केली. शिबिरात २डी-इको, ईसीजी, नेत्रतपासणी, मोफत चष्मे वाटप, ईएनटी तपासणी, गरजूंना श्रवणयंत्रे आणि दिव्यांगांना काठी व वॉकरचे वाटप करण्यात आले. मळेवाड येथील शिबिरात आढळलेल्या किडनी ट्रान्सप्लांटच्या दोन रुग्णांचा संपूर्ण खर्च शासकीय योजनेतून व परब यांच्या माध्यमातून केला जाणार असून, आतापर्यंत सुमारे पाच हजार रुग्णांनी या मोहिमेचा लाभ घेतला आहे.
याप्रसंगी सावंतवाडीचे उपनगराध्यक्ष ॲड. अनिल निरवडेकर यांनी बांदा, मळेवाड, दोडामार्ग, वेंगुर्ला आणि आंबोली भागांत यशस्वीपणे पार पडलेल्या शिबिरांची माहिती देत प्राथमिक आरोग्य केंद्रांतील ‘टेलिमेडिसिन’ सुविधेचा उल्लेख केला.
