अतुल काळसेकर यांच्या हस्ते उद्घाटन; गोवा भाजयुमो अध्यक्ष तुषार केळकर यांची उपस्थिती, शेकडो नागरिकांचा उत्स्फूर्त प्रतिसाद
दोडामार्ग,दि.१६: पंतप्रधान नरेंद्र मोदी यांच्या सेवाभावी विचारांतून, भाजपा प्रदेशाध्यक्ष रवींद्र चव्हाण यांच्या माध्यमातून तसेच पालकमंत्री नितेश राणे यांच्या प्रेरणेने भाजपा राज्य युवा नेते विशाल परब यांच्या वाढदिवसानिमित्त येथे आयोजित करण्यात आलेल्या भव्य महाआरोग्य शिबिराला नागरिकांचा उत्स्फूर्त प्रतिसाद लाभला. वाढदिवसाचा खर्च केवळ सत्कार आणि शुभेच्छांपुरता मर्यादित न ठेवता सामाजिक बांधिलकीतून सर्वसामान्य आणि गरजू रुग्णांना दर्जेदार आरोग्यसेवा उपलब्ध करून देण्याचा स्तुत्य उपक्रम यावेळी राबविण्यात आला.
या महाआरोग्य शिबिराचे उद्घाटन महाराष्ट्र राज्य भाजपा उपाध्यक्ष तथा सिंधुदुर्ग जिल्हा बँकेचे उपाध्यक्ष अतुल काळसेकर यांच्या हस्ते श्रीफळ वाढवून झाले. यावेळी प्रमुख पाहुणे म्हणून गोवा राज्य भाजपा युवा मोर्चाचे अध्यक्ष तुषार केळकर उपस्थित होते. याप्रसंगी व्यासपीठावर भाजपा राज्य युवा नेते विशाल परब, नगराध्यक्ष चेतन चव्हाण, भाजपा माजी तालुकाध्यक्ष रंगनाथ गवस, पराशर सावंत, डॉ. बाबासाहेब राणे आदी मान्यवर उपस्थित होते. वाढदिवसाचे औचित्य साधून तळागाळातील घटकांपर्यंत वैद्यकीय सेवा पोहोचवण्याचा हा प्रयत्न अत्यंत कौतुकास्पद असून अशा उपक्रमांची ग्रामीण भागात नितांत गरज असल्याचे मत यावेळी उपस्थितांनी व्यक्त केले.
कार्यक्रमाच्या प्रारंभी माजी तालुकाध्यक्ष रंगनाथ गवस यांनी प्रास्ताविकातून शिबिराच्या आयोजनामागची भूमिका विशद केली. त्यानंतर मान्यवरांच्या हस्ते दीपप्रज्वलन व श्रीफळ वाढवून तपासणी मोहिमेला प्रत्यक्ष सुरुवात झाली. कार्यक्रमादरम्यान भाजपा राज्य उपाध्यक्ष अतुल काळसेकर, गोवा भाजयुमो अध्यक्ष तुषार केळकर, सचिव श्री. केणी, जिल्हा परिषद सदस्य श्वेता धरणे, सभापती पार्वती गवस, पंचायत समिती सदस्य संजय सातार्डेकर, सदस्या सोनाली नाईक यांच्यासह उपस्थित मान्यवरांचा विशेष सन्मान करण्यात आला. नगराध्यक्ष चेतन चव्हाण व जिल्हा परिषद सदस्य दीपक गवस यांनी मनोगत व्यक्त करताना विशाल परब यांना वाढदिवसाच्या शुभेच्छा दिल्या आणि अशा जनहितोपयोगी उपक्रमाचे आयोजन केल्याबद्दल आयोजकांचे आभार मानले. संपूर्ण कार्यक्रमाचे नेटके सूत्रसंचालन निलेश गुरव यांनी केले. शिबिरात परिसरातील शेकडो नागरिकांनी उपस्थित राहून विविध तज्ज्ञ डॉक्टरांकडून आरोग्य तपासणी आणि वैद्यकीय सल्ल्याचा लाभ घेतला