संपादकीय : आनंद धोंड
सावंतवाडी,दि.१५: राजकारणात पदापेक्षा कार्याला आणि शब्दांपेक्षा कृतीला महत्त्व देणारे नेतृत्व सहसा दुर्मिळ मानले जाते. मात्र, सामाजिक भान, अथांग दातृत्व आणि जनसेवेची अढळ निष्ठा यांच्या बळावर अल्पावधीतच सिंधुदुर्गच्या राजकारणात आणि जनमानसात आपले स्वतंत्र स्थान निर्माण करणारे युवा व्यक्तिमत्त्व म्हणजे विशाल प्रभाकर परब. भाजपचे सक्रिय युवा नेते, यशस्वी उद्योजक आणि भारतीय जनता युवा मोर्चाचे माजी (भाजयुमो) महाराष्ट्र प्रदेश उपाध्यक्षपद विशाल परब यांचा आज वाढदिवस. त्यानिमित्ताने त्यांच्या सामाजिक, राजकीय आणि विकासाभिमुख वाटचालीचा घेतलेला हा वेध.
विशाल परब यांच्या कार्याचा गाभा म्हणजे गोरगरिबांप्रती असलेली आत्मीयता. राजकारण हे सत्तेचे साधन न मानता समाज परिवर्तनाचे माध्यम आहे, हे त्यांनी प्रत्यक्ष कृतीतून दाखवून दिले आहे. त्यांच्या कार्यालयाची पायरी चढलेला कोणताही गरजू व्यक्ती कधीही रिकाम्या हाताने परतत नाही, हा आजवरचा जनमानसातील अनुभव आहे. मग ते वैद्यकीय उपचारासाठी लागणारे आर्थिक साहाय्य असो, विद्यार्थ्यांच्या शिक्षणासाठीची मदत असो वा संकटग्रस्त कुटुंबाला दिलेला आधार—अडलेल्या-नडलेल्यांच्या हाकेला तत्परतेने धावून जाणारा नेता म्हणून त्यांची ख्याती आहे.
आरोग्यसेवेच्या क्षेत्रात त्यांनी घेतलेला पुढाकार विशेष उल्लेखनीय ठरला आहे. सावंतवाडी, दोडामार्ग आणि वेंगुर्ला तालुक्यांत त्यांनी मोठ्या प्रमाणावर मोफत ‘महाआरोग्य शिबिरे’ आयोजित करून हजारो नागरिकांना अत्याधुनिक आरोग्य तपासणी व उपचारांची सुविधा उपलब्ध करून दिली. याशिवाय, गावागावांत सेवा देणाऱ्या आशा स्वयंसेविकांचा यथोचित सन्मान करून त्यांनी सामाजिक कृतज्ञतेचा नवा वस्तुपाठ घालून दिला आहे.
तरुणाईचा आधारस्तंभ आणि क्रीडा-सांस्कृतिक पुनरुज्जीवन
कोकणातील समृद्ध संस्कृती आणि क्रीडा परंपरेला नवसंजीवनी देण्याचे काम विशाल परब सातत्याने करत आहेत. स्थानिक तरुणांमधील सुप्त कलागुणांना वाव मिळावा यासाठी भव्य क्रीडा स्पर्धांचे आयोजन, विविध सांस्कृतिक उपक्रम आणि सण-उत्सवांच्या माध्यमातून त्यांनी थेट तळागाळातील घटकांशी घट्ट नाते जोडले आहे. म्हणूनच आज सावंतवाडी विधानसभा मतदारसंघातील तरुणाईच्या गळ्यातील ते ताईत बनले आहेत.
त्यांच्या या व्यापक सामाजिक प्रवासात त्यांच्या धर्मपत्नी सौ. वेदिका परब यांची मिळणारी भक्कम साथ ही त्यांच्या कौटुंबिक आणि सामाजिक बांधिलकीचे सुंदर उदाहरण आहे. महिला सक्षमीकरण आणि विविध सामाजिक उपक्रमांत सौ. वेदिका परब यांचा असलेला सक्रिय सहभाग हा परब यांच्या जनसंपर्काला अधिक व्यापक आणि सर्वसमावेशक बनवतो.
सावंतवाडी विधानसभा मतदारसंघ आणि जनमानसातील विश्वास
सावंतवाडी, दोडामार्ग आणि वेंगुर्ला या तिन्ही तालुक्यांत विशाल परब यांचा दांडगा जनसंपर्क आणि शिस्तबद्ध कार्यकर्ता वर्ग आहे. भाजपचे ज्येष्ठ नेते व प्रदेशाध्यक्ष रवींद्र चव्हाण यांचे निकटवर्तीय म्हणून संघटनात्मक पातळीवर त्यांनी पक्षाची ताकद मोठ्या प्रमाणावर वाढवली आहे.
सुलभ, मनमिळावू आणि नेहमी चेहऱ्यावर हसू ठेवून प्रत्येकाचे म्हणणे ऐकून घेणारा नेता अशी त्यांची ओळख आहे. शैक्षणिक, क्रीडा, आरोग्य आणि सांस्कृतिक अशा चौफेर आघाड्यांवर त्यांनी केलेल्या ठोस कार्यामुळेच आज सावंतवाडी मतदारसंघाच्या कानाकोपऱ्यात “आगामी काळातील नेतृत्व म्हणून विशाल परब हेच जनतेचा खरा आवाज आहेत” असा जनमानसातून सूर उमटत आहे.
कर्तृत्व, दातृत्व आणि सक्षम नेतृत्वाचे धनी असलेले भाजप युवा नेते विशाल प्रभाकर परब यांना वाढदिवसाच्या मनःपूर्वक आणि कोटी कोटी शुभेच्छा! त्यांना निरोगी, दीर्घायुष्य लाभो आणि कोकणच्या सर्वांगीण विकासासाठी त्यांच्या हातून अशीच निरंतर जनसेवा घडो, हीच सदिच्छा.
कोकण दर्शन डिजिटल मीडिया या न्यूज चॅनल कडून विशाल परब यांना वाढदिवसाच्या हार्दिक शुभेच्छा
