प्रशालेतून भविष्यात प्रशासकीय अधिकारी घडावेत : संस्थेचे सचिव व्ही. बी. नाईक यांचे प्रतिपादन
सावंतवाडी,दि.११: येथील राणी पार्वती देवी हायस्कूल व ज्युनिअर कॉलेजमध्ये विविध स्पर्धा परीक्षांमध्ये दैदिप्यमान यश मिळविणाऱ्या गुणवंत विद्यार्थ्यांचा गुणगौरव सोहळा मोठ्या उत्साहात संपन्न झाला. या कार्यक्रमाच्या अध्यक्षस्थानी संस्थेचे सचिव व्ही. बी. नाईक उपस्थित होते. दीपप्रज्वलन आणि सरस्वती मातेच्या प्रतिमेचे पूजन करून कार्यक्रमाची सुरुवात करण्यात आली. प्रशालेच्या मुख्याध्यापिका डॉ. सुमेधा नाईक-धुरी यांनी प्रास्ताविकातून गुणवंत विद्यार्थ्यांचे कौतुक केले व संस्थेमार्फत विद्यार्थ्यांच्या सर्वांगीण विकासासाठी राबविल्या जाणाऱ्या विविध उपक्रमांची सविस्तर माहिती दिली.
अध्यक्षीय भाषणात बोलताना संस्थेचे सचिव व्ही. बी. नाईक यांनी विद्यार्थ्यांना मार्गदर्शन केले. शिष्यवृत्ती परीक्षेत संपादन केलेले यश हे पुढील स्पर्धा परीक्षांमध्येही कायम राखले पाहिजे, असे सांगत विद्यार्थ्यांनी या यशाने हुरळून न जाता सातत्य ठेवावे, असे आवाहन त्यांनी केले. आरपीडी प्रशालेची उज्ज्वल यशाची परंपरा अविरत चालू राहावी आणि या प्रशालेतून आगामी काळात प्रशासकीय अधिकारी निर्माण व्हावेत, अशी अपेक्षा त्यांनी व्यक्त केली. तसेच शिष्यवृत्ती परीक्षेच्या पूर्वतयारीसाठी प्रशालेच्या वतीने विशेष वर्ग सुरू असून विद्यार्थ्यांनी त्याचा जास्तीत जास्त लाभ घ्यावा, असेही त्यांनी नमूद केले. याप्रसंगी संस्थेचे अध्यक्ष तथा जिल्हा परिषद सदस्य विक्रांत सावंत यांनी दूरस्थ प्रणालीद्वारे (व्हर्च्युअल) उपस्थित राहून यशस्वी विद्यार्थ्यांचे अभिनंदन करत भावी वाटचालीस शुभेच्छा दिल्या.
कार्यक्रमात विविध स्पर्धा परीक्षांमध्ये घवघवीत यश मिळवणाऱ्या गुणवंत विद्यार्थ्यांचा पालकांसह सन्मानचिन्ह व रोख शिष्यवृत्ती प्रदान करून यथोचित गौरव करण्यात आला. या सोहळ्यास संस्था उपाध्यक्ष डॉ. दिनेश नागवेकर, खजिनदार सी. एल. नाईक, सदस्य प्रा. बागवे, पर्यवेक्षक श्री. मुठे, माजी मुख्याध्यापक श्री. ढोकरे पाटील, माजी उपप्राचार्य श्री. नंदीहळी, माजी कलाशिक्षक श्री. मालवणकर, ज्येष्ठ सामाजिक कार्यकर्ते संजय कानसे, माजी शिक्षक श्री. नाईक यांच्यासह इतर मान्यवर उपस्थित होते. कार्यक्रमाचे सूत्रसंचालन पूनम कोचरेकर यांनी केले. या सोहळ्यास शिक्षक, विद्यार्थी आणि पालक वर्ग मोठ्या संख्येने उपस्थित होता.