अंश राऊळ आणि विधी वेंगुर्लेकर यांची कोल्हापूर विभागीय स्पर्धेसाठी निवड; शाळा व्यवस्थापनाकडून अभिनंदन
सावंतवाडी, दि.०७: सिंधुदुर्ग जिल्हा क्रीडा अधिकारी कार्यालयातर्फे आयोजित जिल्हास्तरीय शालेय स्केटिंग स्पर्धेत यशवंतराव भोसले इंटरनॅशनल स्कूलच्या विद्यार्थ्यांनी उत्कृष्ट खेळाचे प्रदर्शन घडवत दुहेरी यश संपादन केले आहे. ११ वर्षांखालील मुलांच्या इनलाइन स्केटिंग प्रकारात इयत्ता पाचवीतील अंश राऊळ याने वेगवान व कौशल्याधिष्ठित कामगिरीच्या जोरावर जिल्ह्यात प्रथम क्रमांक पटकावला, तर ११ वर्षांखालील मुलींच्या क्वाड स्केटिंग प्रकारात इयत्ता तिसरीतील विधी वेंगुर्लेकर हिने आपल्या सफाईदार खेळाने प्रतिस्पर्ध्यांवर मात करत प्रथम क्रमांक मिळवला. जिल्हा पातळीवर मिळवलेल्या या नेत्रदीपक यशामुळे या दोन्ही गुणवंत खेळाडूंची कोल्हापूर येथे होणाऱ्या विभागीय स्केटिंग स्पर्धेसाठी सिंधुदुर्ग जिल्ह्याच्या संघात निवड झाली आहे. या उल्लेखनीय यशाबद्दल शाळेचे संचालक मंडळ, मुख्याध्यापिका प्रियंका देसाई, उपमुख्याध्यापिका अवंतिका नाईक तसेच शिक्षकवृंद आणि शिक्षकेतर कर्मचाऱ्यांनी दोन्ही विद्यार्थ्यांचे कौतुक करत त्यांना पुढील विभागीय स्पर्धेसाठी मनःपूर्वक शुभेच्छा दिल्या आहेत.