१४, १७ आणि १९ वर्षे वयोगटात पटकावले विजेतेपद; तिन्ही संघ जिल्हास्तरीय स्पर्धेसाठी पात्र
सावंतवाडी,दि.०७: क्रीडा व युवक संचालनालय, जिल्हा क्रीडा परिषद व जिल्हा क्रीडा अधिकारी कार्यालय सिंधुदुर्ग यांच्या संयुक्त विद्यमाने येथील सिंधुदुर्ग सैनिक स्कूल अँड ज्युनियर कॉलेजच्या मैदानावर पार पडलेल्या तालुकास्तरीय शालेय फुटबॉल स्पर्धेत सिंधुदुर्ग सैनिक स्कूल आंबोलीच्या खेळाडूंनी तिन्ही वयोगटांत अजिंक्यपद पटकावून एकहाती वर्चस्व राखले. १४ वर्षे वयोगटात ५, १७ वर्षे वयोगटात ५ आणि १९ वर्षे वयोगटात ३ संघांनी या स्पर्धेत सहभाग घेतला होता. या सर्व फेऱ्यांमध्ये आंबोलीच्या संघाने उत्कृष्ट सांघिक खेळ, अचूक समन्वय आणि शिस्तीचे दर्शन घडवत प्रतिस्पर्धी संघांना पराभूत केले.
स्पर्धेतील १४ वर्षे मुलांच्या वयोगटात सिंधुदुर्ग सैनिक स्कूलने सुरुवातीपासूनच आक्रमक आणि आत्मविश्वासपूर्ण खेळ सादर करत बाजी मारली, तर खेमराज स्कूल बांदा संघाला उपविजेतेपदावर समाधान मानावे लागले. १७ वर्षे वयोगटातही सैनिक स्कूलच्या संघाने आपली विजयी घोडदौड कायम राखत सेंट फ्रान्सिस झेवियर आजगाव संघाला नमवून विजेतेपदावर शिक्कामोर्तब केले. १९ वर्षे वयोगटात झालेल्या चुरशीच्या लढतीत आंबोलीच्या खेळाडूंनी दमदार खेळाचे प्रदर्शन करत मिलग्रीस स्कूल सावंतवाडी संघाचा पराभव केला आणि तिन्ही वयोगटांतील चषक आपल्या नावावर केले.
या ऐतिहासिक विजयामुळे सिंधुदुर्ग सैनिक स्कूलचे तिन्ही संघ आता जिल्हास्तरीय फुटबॉल स्पर्धेसाठी पात्र ठरले आहेत. या यशात क्रीडा शिक्षक सतीश आईर, मनोज देसाई, शिवराज पवार आणि जयराम कोळी यांच्या मार्गदर्शनाचा मोठा वाटा राहिला. शाळेच्या या नेत्रदीपक कामगिरीबद्दल संस्थेचे अध्यक्ष सुनील राऊळ, सचिव जॉय डांटस, प्राचार्य नितीन गावडे, कार्यालयीन सचिव दीपक राऊळ तसेच पालक वर्गाने विजेत्या खेळाडूंचे आणि मार्गदर्शकांचे कौतुक करत जिल्हास्तरीय स्पर्धेसाठी त्यांना मनःपूर्वक शुभेच्छा दिल्या.