युवा नेते विशाल परब यांच्या वाढदिवसानिमित्त उपक्रम; ‘सेवा संकल्प अभियान’ अंतर्गत शेतकऱ्यांच्या बांधावर थेट मदतीचा निर्धार
सिंधुदुर्ग,दि.०१ : जिल्ह्यातील पाणीटंचाईग्रस्त भागांमध्ये जलसंधारणाची कामे युद्धपातळीवर राबवण्यासाठी सुमारे ५० लहान-मोठे बंधारे उभारण्याचा संकल्प करण्यात आला आहे. या उपक्रमाला प्रशासकीय गती मिळवून देण्यासाठी भाजप प्रदेशाध्यक्ष आमदार रवींद्र चव्हाण यांनी सिंधुदुर्गचे पालकमंत्री नितेश राणे यांच्याकडे पाठपुरावा केला असून, पालकमंत्र्यांच्या आदेशानंतर जिल्हा प्रशासन आता ॲक्शन मोडवर आले आहे.
पंतप्रधानांच्या ‘सेवा संकल्प अभियान’ आणि वाढदिवसाचे औचित्य
पंतप्रधान नरेंद्र मोदी यांच्या सार्वजनिक जीवनातील २५ वर्षांच्या पूर्तीनिमित्त देशभरात राबवल्या जाणाऱ्या ‘सेवा संकल्प अभियान’च्या अनुषंगाने हा निर्णय घेण्यात आला आहे. भाजप युवा नेते विशाल प्रभाकर परब यांच्या वाढदिवसाचे औचित्य साधून केवळ औपचारिक सत्कार किंवा फलकबाजी न करता शेतकऱ्यांना प्रत्यक्ष बांधावर जाऊन दिलासा देण्याचा निश्चय करण्यात आला आहे.
सावंतवाडी मतदारसंघातील भूजल पातळी वाढवण्यावर भर
या मोहिमेअंतर्गत प्रामुख्याने सावंतवाडी विधानसभा मतदारसंघातील तीव्र पाणीटंचाई निवारणावर भर दिला जाणार आहे. पावसाचे पाणी अडवून भूजल पातळी वाढवणे, शेतीसाठी शाश्वत सिंचनाची सोय उपलब्ध करणे आणि दुष्काळसदृश परिस्थितीवर मात करणे या उद्देशाने लोकसहभागातून हे ५० बंधारे उभारले जातील.
प्रशासकीय यंत्रणेला समन्वयाचे निर्देश
बंधाऱ्यांसाठी योग्य जागांची निवड, तांत्रिक पाहणी, शासकीय परवानग्या आणि आवश्यक यंत्रसामग्री पुरवण्यासाठी सर्व संबंधित शासकीय विभागांनी समन्वयाने काम करावे, अशी मागणी आमदार रवींद्र चव्हाण यांनी निवेदनाद्वारे केली होती. त्यानुसार प्रशासनाला तातडीने कामाला लागण्याचे निर्देश पालकमंत्री नितेश राणे यांनी दिले आहेत.
“शेतकऱ्यांच्या बांधावर मदतीचा हात आणि गावागावांत पाण्याचा साठा” या भूमिकेतून सुरू होणारा हा उपक्रम कोकणातील ग्रामीण पाणीप्रश्नावर ठोस उपाय ठरेल, असा विश्वास व्यक्त केला जात आहे.
