शिक्षण प्रसारक मंडळाचे अध्यक्ष श्रीकृष्ण पेडणेकर यांच्या हस्ते उत्साहात उद्घाटन; विजेत्या संघांना मानाचे चषक
सावंतवाडी,दि.२६: क्रीडा व युवक सेवा संचालनालय, महाराष्ट्र राज्य, पुणे आणि जिल्हा क्रीडा कार्यालय यांच्या संयुक्त विद्यमाने आयोजित तसेच सावंतवाडी तालुका व्यवस्थापन समितीच्या वतीने घेण्यात येणाऱ्या १७ वर्षे वयोगटातील मुला-मुलींच्या तालुकास्तरीय कबड्डी स्पर्धांचे उद्घाटन येथे मोठ्या उत्साहात संपन्न झाले. शिक्षण प्रसारक मंडळ तळवडे संचलित श्री जनता विद्यालय व कनिष्ठ महाविद्यालयाच्या क्रीडांगणावर संस्थेचे अध्यक्ष श्रीकृष्ण पेडणेकर यांच्या हस्ते श्रीफळ वाढवून या स्पर्धेचा शानदार प्रारंभ करण्यात आला.
या उद्घाटन सोहळ्याप्रसंगी संस्थेचे उपाध्यक्ष डॉ. भालचंद्र कांडरकर, सचिव न्हानू ऊर्फ दादा पेडणेकर, खजिनदार सुरेश गावडे, संचालक देवेश कावळे, तालुका क्रीडा समन्वयक नंदकुमार नाईक, जनता विद्यालयाचे मुख्याध्यापक प्रतापराव देसाई, माजगाव विद्यालयाचे मुख्याध्यापक भाऊसाहेब चवरे, पालक-शिक्षक संघाचे माजी उपाध्यक्ष उमेश पावणोजी तसेच पर्यवेक्षक व क्रीडा शिक्षक दयानंद बांगर यांच्यासह विविध शाळांचे क्रीडा शिक्षक, मार्गदर्शक आणि क्रीडारसिकांची मोठी उपस्थिती होती.
यावेळी उपस्थित मान्यवरांनी खेळाडूंना मार्गदर्शन करताना खेळातून व्यक्तिमत्त्व घडते, असे सांगत सर्व सहभागी संघांचे कौतुक केले. संस्था सचिव दादा पेडणेकर आणि मुख्याध्यापक प्रतापराव देसाई यांनी खेळाडूंना क्रीडावृत्तीने खेळण्याचे आवाहन करत शुभेच्छा दिल्या. तालुका क्रीडा समन्वयक नंदकुमार नाईक यांनी स्पर्धेचे नियम आणि तांत्रिक बाबींसंबंधी खेळाडूंना आवश्यक सूचना दिल्या. तत्पूर्वी, जनता विद्यालयाची विद्यार्थिनी कु. आर्या पोवणोजी हिने सर्व खेळाडूंना खिलाडूवृत्तीची शपथ दिली. कार्यक्रमाचे नेटके सूत्रसंचालन क्रीडा शिक्षक दयानंद बांगर यांनी केले.
दरम्यान, या चुरशीच्या स्पर्धेत मुलांच्या गटातील विजेत्या संघाला शिक्षण प्रसारक मंडळ, तळवडे यांच्या वतीने मानाचा चषक प्रदान करण्यात येणार असून, मुलींच्या गटातील विजेत्या संघाला होडावडे येथील क्रीडा साहित्य विक्रेते अमोल परब यांच्यातर्फे आकर्षक चषक देऊन गौरवण्यात येणार आहे. उद्घाटनानंतर विविध विद्यालयांच्या संघांमध्ये चुरशीचे सामने रंगले आहेत.