बूथ बांधणी अन् आगामी राजकीय समीकरणांवर मंथन; जिल्हाध्यक्ष प्रभाकर सावंत यांच्या नेतृत्वात ठरणार ‘मिशन सिंधुदुर्ग’चा नवा रोडमॅप
सावंतवाडी,दि.०८: भारतीय जनता पक्ष, सिंधुदुर्ग जिल्ह्याच्या संघटनात्मक वाटचालीला नवी दिशा देण्यासाठी जिल्हा कार्यकारिणीची महत्त्वपूर्ण बैठक उद्या बुधवार, ९ सप्टेंबर रोजी सकाळी १० वाजता सावंतवाडी येथील बॅ.नाथ पै सभागृहात आयोजित करण्यात आली आहे. जिल्हाध्यक्ष प्रभाकर सावंत यांच्या नेतृत्वाखाली होणाऱ्या या बैठकीकडे संपूर्ण जिल्ह्यातील भाजप पदाधिकारी व कार्यकर्त्यांचे लक्ष लागून राहिले आहे.
आगामी काळातील पक्षाची संघटनात्मक रणनीती, बूथ पातळीवरील बांधणी, विविध उपक्रमांचे नियोजन आणि पक्ष विस्ताराच्या दृष्टीने आवश्यक असलेल्या बाबींवर या बैठकीत सविस्तर चर्चा होणार आहे. जिल्ह्यात भाजपची संघटनात्मक ताकद अधिक भक्कम करण्यासाठी उपस्थित पदाधिकाऱ्यांना या वेळी वरिष्ठ नेत्यांकडून मार्गदर्शन केले जाईल.
या बैठकीस जिल्ह्यातील पक्षाचे प्रमुख पदाधिकारी, लोकप्रतिनिधी, कार्यकारिणी सदस्य तसेच विविध आघाड्या व मोर्चांचे प्रमुख उपस्थित राहणार आहेत. त्यामुळे ही बैठक केवळ औपचारिक न ठरता जिल्ह्यातील आगामी राजकीय समीकरणे आणि पक्षाच्या पुढील वाटचालीची दिशा निश्चित करणारी ठरेल, असा विश्वास व्यक्त केला जात आहे.