रक्तदान हेच श्रेष्ठ सामाजिक कार्य, नाभिक समाजाच्या पाठीशी ठाम राहणार : संजू परब यांचे आश्वासन
सावंतवाडी,दि.०८: सावंतवाडी तालुका नाभिक संघटनेच्या वतीने आयोजित करण्यात आलेल्या महारक्तदान शिबिराचे उद्घाटन शिवसेना जिल्हाप्रमुख, माजी नगराध्यक्ष तथा विद्यमान नगरसेवक संजू परब यांच्या शुभहस्ते अत्यंत उत्साही वातावरणात पार पडले. सामाजिक बांधिलकी जपत संघटनेने घेतलेल्या या स्तुत्य उपक्रमाचे सर्वस्तरातून कौतुक होत आहे. याप्रसंगी सावंतवाडीच्या विकासात आणि सामाजिक कार्यात तत्पर राहिल्याबद्दल नाभिक संघटनेच्या पदाधिकाऱ्यांनी संजू परब यांचा शाल व श्रीफळ देऊन विशेष सत्कार केला.
रक्तदान शिबिराच्या उद्घाटनप्रसंगी उपस्थितांना संबोधित करताना संजू परब यांनी रक्तदानाचे मानवी जीवनातील महत्त्व विशद केले. रक्तदान हे सर्वात मोठे आणि श्रेष्ठ सामाजिक कार्य असून, दुर्दैवाने ऐनवेळी गरजू रुग्णांना रक्ताचा तुटवडा भासू नये यासाठी अशा शिबिरांची नितांत गरज असते, असे मत त्यांनी व्यक्त केले. नाभिक संघटनेने समाजाप्रति दाखवलेली ही तत्परता वाखाणण्याजोगी असून, या संघटनेच्या प्रत्येक न्याय्य हक्कासाठी आणि अडीअडचणीत आपण सदैव खंबीरपणे पाठीशी राहू, अशी ग्वाहीही त्यांनी या वेळी दिली.
या सोहळ्याला नाभिक संघटनेचे सर्व प्रमुख पदाधिकारी, सदस्य तसेच शिवसेना जिल्हा सचिव परीक्षित मांजरेकर, ओबीसी मोर्चा तालुकाप्रमुख वासुदेव होडावडेकर, युवासेना तालुकाप्रमुख क्लेटस फर्नांडीस, उपतालुकाप्रमुख राकेश पवार, राजू मुळीक आणि संदीप तळवणेकर यांच्यासह स्थानिक कार्यकर्ते व नागरिक मोठ्या संख्येने उपस्थित होते.