उपक्रमशील शिक्षक हंसराज गवळे यांच्या मार्गदर्शनाखाली कार्यशाळा संपन्न; पहिली ते सातवीच्या विद्यार्थ्यांचा उत्स्फूर्त सहभाग
सावंतवाडी,दि.०८: मातीचा साधा गोळा हातात घेतला आणि त्याला कल्पकतेची जोड मिळाली की, त्यातून एक सुंदर कलाकृती साकारते, याचा प्रत्यय सावंतवाडी तालुक्यातील इन्सुली शाळा क्रमांक ५ येथे नुकत्याच झालेल्या आगळ्यावेगळ्या मातीकाम कार्यशाळेत आला. गणरायाच्या आगमनाची चाहूल लागलेली असतानाच शाळेत आयोजित करण्यात आलेल्या या उपक्रमामुळे विद्यार्थ्यांमध्ये प्रचंड उत्साह पाहायला मिळाला. उपक्रमशील शिक्षक हंसराज गवळे यांच्या मार्गदर्शनाखाली पहिली ते सातवीच्या चिमुकल्या विद्यार्थ्यांनी आपल्या नाजूक हातांनी मातीपासून सुबक आणि आकर्षक श्री गणेशमूर्ती साकारत आपल्या कलागुणांना मुक्त वाट करून दिली.
या कार्यशाळेत केवळ गणपतीची मूर्तीच नव्हे, तर बाप्पाचा आवडता मोदक आणि त्याचे वाहन असलेला ‘उंदीरमामा’ मातीपासून कसा साकारायचा, याचे सखोल प्रात्यक्षिक हंसराज गवळे यांनी विद्यार्थ्यांना दिले. मातीला आकार देताना तिचा पोत, योग्य प्रमाण, रचना आणि कलात्मक बारकावे याबाबत त्यांनी मार्गदर्शन केले. सुरुवातीला मातीला आकार देताना काही विद्यार्थ्यांच्या हातून बाप्पाचे रूप थोडे वेगळे दिसत होते; मात्र शिक्षकांच्या मार्गदर्शनाने त्यांनी हळूहळू गणरायाला मनोहारी रूप दिले. कुणी बाप्पाची सुंदर सोंड घडवली, तर कुणी मुकुट, कान, डोळे आणि विविध अलंकारांना कल्पक आकार देत मूर्ती सजवली. आपल्या हाताने साकारलेला बाप्पा पाहताना विद्यार्थ्यांच्या चेहऱ्यावर उमटलेले आनंद आणि समाधान पाहण्यासारखे होते.
‘शिकता शिकता अनुभव घ्यायचा आणि अनुभवातून कला जोपासायची’ या संकल्पनेवर आधारित या उपक्रमाने शाळेच्या शैक्षणिक वातावरणात एक वेगळीच रंगत आणली. या माध्यमातून मातीशी नाते जोडताना विद्यार्थ्यांना पारंपरिक हस्तकलेची ओळख झाली, तर स्वतःच्या हाताने गणरायाची मूर्ती साकारल्याने त्यांच्या सर्जनशीलतेला आणि आत्मविश्वासालाही मोठी ऊर्जा मिळाली. ही कार्यशाळा विद्यार्थ्यांसाठी केवळ मनोरंजनाचा उपक्रम न ठरता कला, संस्कृती, कल्पनाशक्ती आणि पर्यावरणपूरकतेचा सुंदर संगम ठरली.
या उपक्रमासाठी केंद्रप्रमुख श्री. ठाकूर यांचे मोलाचे मार्गदर्शन लाभले, तर शाळेचे मुख्याध्यापक भास्कर माजगावकर आणि ज्येष्ठ शिक्षक सुधीर गावडे यांचे विशेष सहकार्य मिळाले. शिक्षक हंसराज गवळे यांच्या कल्पक नियोजनामुळे ही कार्यशाळा विद्यार्थ्यांसाठी अविस्मरणीय ठरली. मातीच्या साध्या गोळ्याला कल्पनाशक्ती आणि मेहनतीची जोड देत चिमुकल्यांनी साकारलेला हा ‘मातीचा बाप्पा’ पर्यावरणपूरक गणेशोत्सवाचा संदेश देण्यासोबतच विद्यार्थ्यांच्या मनात नवनिर्मितीचा आनंद रुजवणारा ठरला आहे.