जिल्हा परिषद सदस्य विक्रांत सावंत यांच्याकडून सर्वतोपरी सहकार्याचे अभिवचन; नरेंद्र देशपांडे यांच्याकडे अध्यक्षपदाची धुरा
सावंतवाडी,दि.०७: सावंतवाडी शहराला कला आणि संस्कृतीचा समृद्ध वारसा लाभला असून या वैभवाचे जतन व संवर्धन करण्यासाठी स्थापन झालेल्या ‘सम्राट क्लब सावंतवाडी टाऊन’ला सर्वतोपरी सहकार्य केले जाईल, असे ठाम अभिवचन युवा नेते तथा जिल्हा परिषद सदस्य विक्रांत सावंत यांनी दिले. सावंतवाडीच्या कला-संस्कृतीला नवी उंची आणि शिक्षण क्षेत्राला नवी दिशा देण्याची क्षमता या नव्या व्यासपीठात आहे, असा विश्वासही त्यांनी यावेळी व्यक्त केला. आर.पी.डी. हायस्कूलच्या सभागृहात उत्साही वातावरणात पार पडलेल्या ‘सम्राट क्लब सावंतवाडी टाऊन’च्या स्थापना व पदग्रहण सोहळ्यात ते विशेष अतिथी म्हणून बोलत होते.
ऐतिहासिक वारसा आणि शैक्षणिक परंपरेची पताका अभिमानाने मिरविणाऱ्या सावंतवाडीच्या सांस्कृतिक क्षितिजावर या कार्यक्रमाच्या निमित्ताने एका नव्या पर्वाची सुरुवात झाली आहे. सम्राट क्लब इंटरनॅशनलशी संलग्न असलेल्या ‘सम्राट क्लब मये’च्या मार्गदर्शनाखाली या नव्या क्लबची स्थापना करण्यात आली. यात चार्टर्ड प्रेसिडेंटपदी सम्राट नरेंद्र देशपांडे यांची निवड झाली असून, भावी अध्यक्षपदी पत्रकार हरिश्चंद्र पवार तर सचिवपदी प्रा. प्रतिभा चव्हाण यांची वर्णी लागली आहे.
तसेच उपाध्यक्षपदी पृथ्वीराज प्रताप, खजिनदारपदी सुनील राऊळ, संचालकपदी स्मिता केंकरे, डॉ. ज्ञानेश्वर ऐवळे, डॉ. सोनल लेले, गुरुप्रसाद चिटणीस, जनसंपर्क अधिकारीपदी दादा मडकईकर, ऑडिटरपदी कौस्तुभ पेडणेकर आणि प्रोग्राम डायरेक्टरपदी ॲड. सिद्धी परब यांची निवड करण्यात आली. स्थानिक कलागुणांना हक्काचे व्यासपीठ मिळवून देणे आणि शैक्षणिक क्षेत्रात सकारात्मक योगदान देणे या मुख्य ध्येयांना केंद्रस्थानी ठेवून क्लब आगामी काळात विविध विधायक उपक्रम राबविणार आहे.
या सोहळ्याला सावंतवाडी नगरपरिषदेचे उपनगराध्यक्ष ॲड. अनिल निरवडेकर प्रमुख पाहुणे म्हणून उपस्थित होते. तसेच सम्राट क्लब इंटरनॅशनलचे इन्स्टॉलेशन ऑफिसर व डायरेक्टर क्लब एक्स्टेंशन सम्राट धर्मा व्ही. चोडणकर आणि सम्राट शशिकांत पुनाजी यांची प्रमुख उपस्थिती होती. कार्यक्रमाचे प्रास्ताविक सम्राट क्लब मयेचे अध्यक्ष सम्राट नरेश पेडणेकर यांनी करत नव्या क्लबच्या स्थापनेमागील भूमिका स्पष्ट केली. याप्रसंगी माजी अध्यक्ष अर्जुन नाईक यांच्यासह गोवा येथील सम्राट टीमचे पदाधिकारी, स्थानिक कलाकार आणि नागरिक मोठ्या संख्येने उपस्थित होते.
