स्थानिक कलागुण, संस्कृती आणि शिक्षणाला मिळणार संघटित व्यासपीठ; उपनगराध्यक्ष ॲड. अनिल निरवडेकर यांची प्रमुख उपस्थिती
सावंतवाडी,दि.०४: कला, संस्कृती आणि शिक्षणाच्या समृद्ध परंपरेला संघटित व्यासपीठ देत सावंतवाडीच्या सांस्कृतिक विश्वात एका नव्या पर्वाची मुहूर्तमेढ रोवली जात आहे. ‘सम्राट क्लब सावंतवाडी टाउन’ या नव्या क्लबचा स्थापना व पदग्रहण सोहळा रविवार, ६ सप्टेंबर २०२६ रोजी सायंकाळी ६ वाजता राणी पार्वती हायस्कूल व ज्युनिअर कॉलेजच्या सभागृहात आयोजित करण्यात आला आहे. सम्राट क्लब इंटरनॅशनलशी संलग्न असलेल्या सम्राट क्लब मयेच्या मार्गदर्शनाखाली या नव्या क्लबची स्थापना होत असून चार्टर्ड प्रेसिडेंट सम्राट नरेंद्र देशपांडे यांच्या नेतृत्वाखाली क्लबच्या कार्याचा श्रीगणेशा होणार असल्याची माहिती सम्राट क्लब मयेचे अध्यक्ष सम्राट नरेश पेडणेकर यांनी पत्रकार परिषदेत दिली.
या सोहळ्यात ‘सम्राट क्लब सावंतवाडी टाउन’च्या चार्टर्ड प्रेसिडेंटपदी सम्राट नरेंद्र देशपांडे, तर भावी अध्यक्षपदी सम्राट हरिश्चंद्र पवार यांची नियुक्ती करण्यात आली आहे. कार्यकारिणीमध्ये उपाध्यक्षपदी सम्राट पृथ्वीराज प्रताप, सचिवपदी सम्राट प्रतिभा चव्हाण, खजिनदारपदी सम्राट सुनील राऊळ, तर संचालकपदी सम्राट सौ. स्मिता केंकरे, सम्राट डॉ. ज्ञानेश्वर ऐवळे, सम्राट डॉ. सोनल लेले आणि सम्राट गुरुप्रसाद चिटणीस यांची निवड झाली आहे. यासोबतच जनसंपर्क अधिकारी म्हणून सम्राट दादा मडकईकर, ऑडिटर म्हणून सम्राट कौस्तुभ पेडणेकर आणि प्रोग्राम डायरेक्टर म्हणून सम्राट ॲड. सिद्धी परब जबाबदारी सांभाळणार आहेत.
कला, संस्कृती आणि शिक्षण या तीन प्रमुख क्षेत्रांना केंद्रस्थानी ठेवून क्लबच्या माध्यमातून विविध विधायक आणि समाजोपयोगी उपक्रम राबविण्याचा मानस आहे. स्थानिक कलागुणांना हक्काचे व्यासपीठ उपलब्ध करून देणे, सावंतवाडीच्या समृद्ध सांस्कृतिक वारशाचे जतन व संवर्धन करणे आणि शैक्षणिक क्षेत्रात सकारात्मक योगदान देणे ही या क्लबची मुख्य उद्दिष्टे आहेत. सावंतवाडीच्या भूमीतील प्रतिभावंतांना एकत्र आणत त्यांच्या कलेला व्यापक स्वरूप मिळवून देण्याचा प्रयत्न केला जाणार असून, हा क्लब केवळ संस्था न राहता सामाजिक आणि सांस्कृतिक चळवळीचे प्रभावी केंद्र बनेल असा विश्वास व्यक्त करण्यात आला आहे.
या स्थापना व पदग्रहण सोहळ्यास सावंतवाडी नगरपरिषदेचे उपनगराध्यक्ष ॲड. अनिल निरवडेकर प्रमुख पाहुणे म्हणून तर सिंधुदुर्ग जिल्हा परिषदेचे सदस्य विक्रांत सावंत विशेष अतिथी म्हणून उपस्थित राहणार आहेत. तसेच सम्राट क्लब इंटरनॅशनलचे डायरेक्टर क्लब एक्स्टेंशन तथा इन्स्टॉलेशन ऑफिसर सम्राट धर्मा व्ही. चोडणकर आणि सम्राट शशिकांत पुनाजी यांचीही प्रमुख उपस्थिती लाभणार आहे. पत्रकार परिषदेस माजी अध्यक्ष सम्राट अर्जुन नाईक, सम्राट नरेंद्र देशपांडे, सम्राट हरिश्चंद्र पवार, सम्राट गुरुप्रसाद चिटणीस आदी उपस्थित होते. या नव्या व्यासपीठाच्या माध्यमातून सामाजिक बांधिलकी अधिक दृढ करण्याचा प्रयत्न केला जाणार असून, या सोहळ्यास नागरिक व कलाप्रेमींनी मोठ्या संख्येने उपस्थित राहावे, असे आवाहन सम्राट परिवाराच्या वतीने करण्यात आले आहे.