इयत्ता १ ली ते ८ वी च्या विद्यार्थ्यांचा उत्स्फूर्त सहभाग; कल्पकता आणि स्थानिक जैवविविधतेचे घडले दर्शन
सावंतवाडी,दि.३०: येथील संस्कार नॅशनल स्कूलमध्ये विद्यार्थ्यांसाठी आगळावेगळा व निसर्गाशी नाते जोडणारा रानभाज्यांचा महोत्सव तसेच पाना-फुलांपासून बनविलेल्या विविध आकर्षक प्रतिकृतींचे प्रदर्शन अत्यंत उत्साहात संपन्न झाले. या अनोख्या उपक्रमातून विद्यार्थ्यांना आपल्या सभोवतालच्या निसर्गाची ओळख आणि पर्यावरणाचे महत्त्व प्रत्यक्ष अनुभवता आले.
प्रदर्शनामध्ये इयत्ता पाचवी ते आठवीच्या विद्यार्थ्यांनी विविध प्रकारच्या दुर्मीळ व आरोग्यदायी रानभाज्या संकलित करून त्यांची अत्यंत सुंदर मांडणी केली होती. केवळ भाज्या मांडून न थांबता, विद्यार्थ्यांनी प्रत्येक रानभाजीचे नाव, तिचे औषधी उपयोग आणि पौष्टिक महत्त्व याबद्दल उपस्थितांना सविस्तर माहिती दिली. या उपक्रमामुळे विद्यार्थ्यांना आपल्या परिसरातील स्थानिक वनस्पतींचे आरोग्यदायी गुणधर्म समजण्यास मदत झाली.
दरम्यान, इयत्ता पहिली ते चौथीच्या छोट्या विद्यार्थ्यांनी पाने, फुले व इतर नैसर्गिक घटकांचा सुरेख वापर करून अत्यंत कल्पक व सुंदर प्रतिकृती साकारल्या. विद्यार्थ्यांच्या कलागुणांनी आणि सर्जनशीलतेने सजलेल्या या कलाकृती प्रदर्शनात उपस्थितांच्या विशेष कौतुकाचा विषय ठरल्या.
या संपूर्ण प्रदर्शनाला शिक्षक, पालकांसह स्थानिक नागरिकांचा उत्स्फूर्त प्रतिसाद लाभला. या उपक्रमामुळे विद्यार्थ्यांमध्ये निसर्गाविषयी प्रेम, पर्यावरण जागरूकता आणि स्थानिक जैवविविधतेचे ज्ञान वृद्धिंगत झाल्याचे मत उपस्थितांनी व्यक्त केले.
सदर कार्यक्रमासाठी संस्थेचे चेअरमन डॉ. शेखर जैन सर यांचे मोलाचे मार्गदर्शन लाभले. तसेच प्रदर्शन यशस्वी करण्यासाठी प्रशालेच्या मुख्याध्यापिका सौ. प्रणाली रेडकर मॅडम, समन्वयक श्री. अजय बांदेकर सर यांच्यासह सर्व शिक्षक व शिक्षकेतर कर्मचाऱ्यांनी विशेष परिश्रम घेतले.
