विद्यार्थ्यांमध्ये आरोग्याविषयी जनजागृती; विविध स्पर्धांतील विजेत्यांचा प्रमाणपत्र व पारितोषिक देऊन सत्कार
सावंतवाडी, दि.२७: प्राथमिक आरोग्य केंद्र सांगेली व आरोग्य उपकेंद्र कलंबिस्त यांच्या संयुक्त विद्यमाने कलंबिस्त इंग्लिश स्कूलमध्ये ‘कुष्ठरोग आजार समज-गैरसमज’ आणि ‘परिसर स्वच्छता’ या विषयांवर आयोजित निबंध व चित्रकला स्पर्धांचा पारितोषिक वितरण सोहळा नुकताच पार पडला. याप्रसंगी माता-पालकांसाठी विद्यार्थ्यांचा आहार व आरोग्य याविषयी विशेष मार्गदर्शन सत्राचेही आयोजन करण्यात आले होते.
कार्यक्रमाची सुरुवात प्रमुख अतिथींच्या उपस्थितीत झाली. ग्रामीण भागात उल्लेखनीय वैद्यकीय सेवा बजावणाऱ्या सांगेली आरोग्य केंद्राच्या वैद्यकीय अधिकारी डॉ. अश्विनी घोडे यांचा कलंबिस्त हायस्कूलचे मुख्याध्यापक अभिजित जाधव यांच्या हस्ते शाल व श्रीफळ देऊन विशेष सत्कार करण्यात आला.
यावेळी आयोजित करण्यात आलेल्या चित्रकला स्पर्धेत लहान गटात कु. श्रद्धा सचिन नेवगी (इयत्ता ६ वी) हिने प्रथम तर तनिष्क दीपक जाधव (इयत्ता ६ वी) याने द्वितीय क्रमांक पटकावला. मोठा गटात कु. विजया विश्वनाथ मेस्त्री (इयत्ता १० वी) हिने प्रथम, तर कु. राधिका रमाकांत मेस्त्री हिने द्वितीय क्रमांक मिळवला.
तसेच निबंध स्पर्धेत लहान गटात कु. खुशी शिवराम धुरी (इयत्ता ६ वी) प्रथम तर कु. काव्या रवींद्र तावडे (इयत्ता ६ वी) द्वितीय क्रमांकाची विजेती ठरली. निबंध स्पर्धा मोठा गटात कु. श्रुती गजानन राऊळ (इयत्ता १० वी) हिने प्रथम तर कु. कीर्ती एकनाथ राऊळ (इयत्ता ८ वी) हिने द्वितीय क्रमांक संपादन केला. सर्व विजेत्या विद्यार्थ्यांना आरोग्य विभागाच्या वतीने प्रमाणपत्र व आकर्षक भेटवस्तू देऊन गौरविण्यात आले.
याप्रसंगी डॉ. अश्विनी घोडे यांनी उपस्थित माता-पालक व विद्यार्थ्यांना दैनंदिन आहार आणि आरोग्याचे महत्त्व याविषयी सविस्तर मार्गदर्शन केले. समूदाय आरोग्य अधिकारी डॉ. मधुमती सावंत, मुख्याध्यापक अभिजित जाधव, शिक्षक किशोर वालावलकर व श्रीम. विनिता कविटकर यांनी आहार-विहाराच्या योग्य सवयी आणि वैयक्तिक स्वच्छता या विषयावर मार्गदर्शन करत उपस्थितांशी संवाद साधला.
या सोहळ्यास समूदाय आरोग्य अधिकारी मधुमती सावंत, आरोग्य सहाय्यक रोशन सापळे, आरोग्य सेवक तेरसे, कलंबिस्त ग्राम विकास अधिकारी केशव पावरा, ग्रामपंचायत सदस्य सुप्रिया राऊळ, ज्येष्ठ शिक्षक धनराज सजगुरे, विनिता कविटकर यांच्यासह माता-पालक व विद्यार्थी मोठ्या संख्येने उपस्थित होते. कार्यक्रमाचे सूत्रसंचालन व उपस्थितांचे आभारप्रदर्शन शिक्षक किशोर वालावलकर यांनी केले.