पारंपरिक खेळांना प्रोत्साहन देण्यासाठी २९ ऑगस्टला रंगणार इयत्तानिहाय सामने
दोडामार्ग, दि.२७: शिक्षण प्रसारक मंडळ सावंतवाडी संचलित दोडामार्ग इंग्लिश स्कूल व ज्युनिअर कॉलेज, दोडामार्ग येथे राष्ट्रीय क्रीडा दिन २०२६ च्या औचित्याने मुलींसाठी विशेष लंगडी स्पर्धेचे शानदार आयोजन करण्यात आले आहे. बँक ऑफ इंडियाच्या दोडामार्ग शाखेचे या स्पर्धेला प्रायोजकत्व लाभले असून शिक्षण प्रसारक मंडळ सावंतवाडीचे अध्यक्ष तथा सिंधुदुर्ग जिल्हा परिषदेचे सदस्य मा. विक्रांत विकासभाई सावंत यांच्या संकल्पनेतून ही स्पर्धा साकारत आहे.
विद्यार्थिनींमध्ये क्रीडाभावना, संघभावना आणि आत्मविश्वासाची पेरणी व्हावी, तसेच शारीरिक तंदुरुस्ती वाढीस लागून महाराष्ट्राच्या पारंपरिक मैदानी खेळांना नव्याने संजीवन मिळावे, या मुख्य उद्देशाने या क्रीडा सोहळ्याचे आयोजन करण्यात आले आहे. “खेळूया, शिकूया, तंदुरुस्त राहूया आणि प्रगती करूया!” या स्फूर्तीदायी संदेशातून विद्यार्थिनींना खेळाकडे अधिक सकारात्मकतेने पाहण्याची प्रेरणा मिळणार आहे.
या स्पर्धेचे स्वरूप इयत्तानिहाय चार गटांमध्ये विभागण्यात आले असून यामध्ये ५ वी विरुद्ध ६ वी, ७ वी विरुद्ध ८ वी, ९ वी विरुद्ध १० वी आणि ११ वी विरुद्ध १२ वी असे रोमहर्षक सामने पाहायला मिळणार आहेत.
ही स्पर्धा शनिवार, दिनांक २९ ऑगस्ट २०२६ रोजी सकाळी ८ ते ११ या वेळेत दोडामार्ग इंग्लिश स्कूल व ज्युनिअर कॉलेजच्या भव्य क्रीडांगणावर पार पडणार आहे. विद्यार्थिनींच्या उत्स्फूर्त सहभागामुळे क्रीडांगणावर मोठी चुरस पाहायला मिळणार असून, राष्ट्रीय क्रीडा दिन उत्साहात साजरा करण्यासाठी विद्यालय प्रशासनाने जय्यत तयारी केली आहे.