देवसू व दाणोली परिसरात पोलिसांचे ३ छापे; ७० हजारांहून अधिक मुद्देमाल जप्त
सावंतवाडी,दि.२६: बेकायदेशीररीत्या विनापरवाना ४ बंदुका आणि खवले मांजर प्राण्याचे खवले बाळगल्याप्रकरणी सावंतवाडी पोलिसांनी मंगळवारी मोठी कारवाई करत चार जणांना अटक केली आहे. मौजे देवसू आणि दाणोली परिसरात पोलिसांनी मारलेल्या तीन वेगवेगळ्या छाप्यांमध्ये ७०,४५० रुपये किमतीचा मुद्देमाल जप्त करण्यात आला आहे.
पोलीस निरीक्षक राजेंद्र मगदूम यांच्या मार्गदर्शनाखाली ०३ पथकांनी ही कारवाई केली. सावंतवाडी पोलीस ठाण्याच्या हद्दीतील देवसू पलीकडचीवाडी येथील गजानन उर्फ अर्जुन सावंत (वय ४२) याच्या घरावर छापा टाकून २०,००० रुपयांची १ ठासणीची बंदूक, १०,००० रुपयांची १ काडतूसाची बंदूक तसेच १.१३५ ग्रॅम वजनाची खवले मांजराची १५४ लहान-मोठी खवले जप्त करण्यात आली.
दुसऱ्या कारवाईत दाणोली गावठणवाडी येथील अशोक लक्ष्मण सावंत (वय ६०) याच्या घरातून २५,००० रुपये किमतीची १ ठासणीची बंदूक जप्त करण्यात आली. तर तिसऱ्या कारवाईत देवसू जाधववाडी येथील संतोष विठ्ठल जाधव (वय ४२) याच्या घरावर छापा मारून २५,००० रुपयांची १ ठासणीची बंदूक जप्त केली. ही बंदूक सुरज धर्मेंद्र सावंत (वय २९, रा. देवसू मधलीवाडी) याने संतोष जाधव याच्याकडे ठेवण्यासाठी दिल्याचे तपासात समोर आले आहे.
या प्रकरणी पोलिसांनी चारही आरोपींना ताब्यात घेतले आहे. ही कारवाई सिंधुदुर्ग पोलीस अधीक्षक डॉ. मोहन दहीकर, अपर पोलीस अधीक्षक नयोमी साटम, उपविभागीय पोलीस अधिकारी राजेश भागवत यांच्या मार्गदर्शनाखाली पोलीस निरीक्षक राजेंद्र मगदूम, सहाय्यक पोलीस निरीक्षक हर्षद हिंगे, पोलीस उपनिरीक्षक अविनाश पाटील तसेच अमलबार निलेश परब, महेश निरवडेकर, ज्योती दुधवडकर, अमित राऊळ, संतोष गलोले, रामदास जाधव, मनिष शिंदे, सचिन चव्हाण, अमिता दळवी व पुजा भाटे यांच्या पथकाने केली.