सावंतवाडीत श्रावण सोमवारी दर्शनासाठी भाविकांची मांदियाळी
सावंतवाडी,दि.२४: येथील ऐतिहासिक राजवाड्यात विराजमान असलेल्या श्री देव पाटेकरांच्या चरणी श्रावण महिन्याच्या दुसऱ्या सोमवारी भक्तिभावाचा अक्षरशः महापूर पाहायला मिळाला. सकाळपासून सुरू असलेल्या रिमझिम पावसाच्या सरीही भक्तांच्या उत्साहाला रोखू शकल्या नाहीत. ‘पाटेकरचरणी माथा टेकवायचाच’ या श्रद्धेने भाविकांनी पावसाची तमा न बाळगता पहाटेपासूनच दर्शनासाठी मोठ्या रांगा लावल्या होत्या. सावंतवाडीकरांच्या श्रद्धेचे आणि भक्तांच्या हाकेला धावून येणारे श्रद्धास्थान म्हणून श्री देव पाटेकर देवस्थानाचे विशेष स्थान असून, श्रावणी सोमवारी या परिसरात अत्यंत भक्तिमय वातावरण निर्माण झाले होते.
या भक्तिमय सोहळ्याच्या दरम्यान राजवाड्याच्या प्रवेशद्वाराजवळ विविध लघुउद्योजकांनी पूजेसाठी आवश्यक फुले, हार, नारळ, प्रसाद तसेच पूजासाहित्याचे स्टॉल थाटले होते. भक्तांच्या गर्दीमुळे या छोट्या व्यावसायिकांना चांगला रोजगार मिळत असतानाच, रिमझिम पावसामुळे त्यांच्या व्यवसायात कोणताही व्यत्यय येऊ नये म्हणून भारतीय जनता पक्षाचे राज्य युवा नेते विशाल परब यांच्या माध्यमातून मोठ्या छत्र्यांची तात्काळ व्यवस्था करण्यात आली. हातात छत्र्यांचा आधार मिळाल्याने लघुउद्योजकांना पावसाच्या सरींमध्येही आपला व्यवसाय सुरळीतपणे चालू ठेवता आला.
वाढत्या भक्तांच्या गर्दीमुळे लघुउद्योजकांसाठी रोजगाराचा आशेचा किरण निर्माण झाला असून, विशाल परब यांनी वेळेवर दिलेल्या छत्र्यांच्या आधारामुळे या व्यावसायिकांना मोठा दिलासा मिळाला. केवळ राजकारण न करता, स्थानिक छोट्या व्यावसायिकांच्या अडचणींची जाणीव ठेवून त्यांना प्रत्यक्ष मदतीचा हात देण्याच्या या भूमिकेचे सर्व स्तरांतून कौतुक होत आहे. श्री देव पाटेकरांचा आशीर्वाद आणि विशाल परब यांच्या छत्र्यांचा आधार यामुळे दुसरा श्रावण सोमवार सावंतवाडीत भक्ती, सेवा आणि सहकार्याचा एक सुंदर संगम ठरला असून, सर्व लघुउद्योजकांनी विशाल परब यांचे मनःपूर्वक आभार व्यक्त केले आहेत.
