सावंतवाडी एज्युकेशन सोसायटी प्राथमिक शाळेचे समूहगीत गायन स्पर्धेत घवघवीत यश
सावंतवाडी,दि.२१: स्वातंत्र्यदिनाचे औचित्य साधून सावंतवाडी नगरपरिषदेच्या वतीने आयोजित करण्यात आलेल्या देशभक्तीपर समूहगीत गायन स्पर्धेत सावंतवाडी एज्युकेशन सोसायटी प्राथमिक शाळेने आपल्या उत्कृष्ट कलागुणांचे प्रदर्शन करत प्रथम क्रमांक पटकावला आहे. इयत्ता पहिली ते चौथीच्या प्राथमिक गटात शाळेच्या विद्यार्थ्यांनी मिळवलेल्या या घवघवीत यशामुळे सर्व स्तरांतून त्यांच्यावर अभिनंदनाचा वर्षाव होत आहे.
नगरपरिषदेने १५ ऑगस्टनिमित्त या सांस्कृतिक स्पर्धेचे आयोजन केले होते. या स्पर्धेत सावंतवाडी एज्युकेशन सोसायटी प्राथमिक शाळेच्या चिमुकल्या विद्यार्थ्यांनी ‘जयोस्तुते’ हे प्रसिद्ध देशभक्तीपर गीत अत्यंत प्रभावीपणे सादर केले. उत्कृष्ट सांघिक सादरीकरण, सुरेल गायन आणि भावपूर्ण अभिव्यक्तीच्या बळावर विद्यार्थ्यांनी उपस्थितांची व परीक्षकांची मने जिंकून अव्वल स्थान पटकावले.
सावंतवाडी एज्युकेशन सोसायटीची प्राथमिक शाळा ही केवळ अभ्यासातच नव्हे, तर ज्ञान, कला व क्रीडा या सर्वच क्षेत्रांत सातत्याने अव्वल राहिली आहे. नुकत्याच झालेल्या शिष्यवृत्ती परीक्षेतही या शाळेच्या अनेक विद्यार्थ्यांनी गुणवत्ता यादीत स्थान मिळवून शैक्षणिक गुणवत्तेची उज्ज्वल परंपरा सिद्ध केली होती. त्यानंतर आता समूहगीत गायन स्पर्धेत मिळवलेला हा विजय म्हणजे शाळेच्या शैक्षणिक व सांस्कृतिक वाटचालीतील आणखी एक मानाचा तुरा ठरला आहे.
विद्यार्थ्यांच्या या उल्लेखनीय यशाबद्दल संस्थेचे अध्यक्ष शैलेश पई, सचिव डॉ. प्रसाद नार्वेकर, सर्व संस्था पदाधिकारी, मुख्याध्यापक सावंत सर आणि सर्व शिक्षकवृंदांनी विजेत्या विद्यार्थ्यांचे विशेष कौतुक केले. तसेच या समूहगीतासाठी विद्यार्थ्यांना मोलाचे व उत्कृष्ट मार्गदर्शन करणाऱ्या शिक्षिका श्रीमती ज्योत्स्ना गुंजाळ यांचेही संस्थेच्या वतीने विशेष अभिनंदन करण्यात आले. चिमुकल्यांच्या या यशामुळे सावंतवाडी एज्युकेशन सोसायटीच्या शिरपेचात पुन्हा एकदा मानाचा तुरा खोवला गेला आहे.