५ हजार वृक्षांचे वाटप, रक्तदान शिबिर, रुग्णालयांना पंखे व गरजू विद्यार्थ्यांना शैक्षणिक साहित्याचे वाटप; शिवसेना तालुकाप्रमुख दिनेश गावडे,महिला जि.ॲड. निता सावंत-कविटकर यांची माहिती
सावंतवाडी,दि.१६: शिवसेना जिल्हाप्रमुख, सावंतवाडी नगरपरिषदेचे माजी नगराध्यक्ष तथा विद्यमान नगरसेवक संजू परब यांच्या वाढदिवसानिमित्त सावंतवाडी, वेंगुर्ला आणि दोडामार्ग या तीन तालुक्यांत विविध सामाजिक व लोकोपयोगी उपक्रमांचे आयोजन करण्यात आले आहे. तब्बल ५ हजार वृक्षांचे वाटप, रक्तदान शिबिर, रुग्णालयांना पंखे, विद्यार्थ्यांना वह्या-पुस्तके तसेच गरजूंना छत्री वाटप अशा विविध उपक्रमांतून त्यांचा वाढदिवस साजरा करण्यात येणार असल्याची माहिती शिवसेना तालुका प्रमुख दिनेश गावडे व महिला जिल्हाप्रमुख ॲड. निता सावंत-कविटकर यांनी पत्रकार परिषदेत दिली.
संजू परब यांचा वाढदिवस १९ ऑगस्ट रोजी विविध सामाजिक उपक्रमांनी उत्साहात साजरा करण्यात येणार आहे. त्याअनुषंगाने १८ ऑगस्ट रोजी नगरसेवक देव्या सूर्याजी मित्रमंडळ, युवा रक्तदाता संघटना आणि शिवसेनेच्या वतीने रक्तदान शिबिराचे आयोजन करण्यात आले आहे.
पर्यावरण संवर्धनाचा संदेश देत तीनही तालुक्यांमध्ये सुमारे ५ हजार वृक्षांचे वाटप करण्यात येणार आहे. तसेच सावंतवाडी, वेंगुर्ला आणि दोडामार्ग येथील रुग्णालयांमध्ये रुग्णांच्या सुविधेसाठी पंखे वाटप केले जाणार असून, लाखे वस्तीमध्ये यापूर्वीच पंखे वाटप करण्यात आले आहे. यासोबतच सावंतवाडीतील जिल्हा परिषद प्राथमिक शाळांमधील विद्यार्थ्यांना वह्या, शिष्यवृत्तीधारक विद्यार्थ्यांना पुस्तके आणि गरजू नागरिकांना छत्र्यांचे वाटप केले जाणार आहे.
या वाढदिवसानिमित्त समाजातील विविध घटकांना मदतीचा हात देण्यात येणार आहे. रोणापाल येथील निराधार मुलांच्या छात्रालयातील विद्यार्थ्यांना खाऊ वाटप करून केक कापण्यात येणार आहे. कोंडूरा येथील विशेष शाळेत फळवाटप, आरोंदा येथील शाळांमध्ये विद्यार्थ्यांना वह्या वाटप तर सावंतवाडी नगरपालिका सफाई कर्मचाऱ्यांना धान्याचे वाटप करण्यात येणार आहे.
दरम्यान, १९ ऑगस्ट रोजी सकाळी १०.३० वाजता गोविंद चित्रमंदिर, सावंतवाडी येथे संजू परब यांचा मुख्य वाढदिवस सोहळा केक कापून साजरा केला जाणार आहे. या कार्यक्रमाला सावंतवाडी मतदारसंघाचे आमदार दीपक केसरकर तसेच कुडाळ-मालवण मतदारसंघाचे आमदार निलेश राणे यांची प्रमुख उपस्थिती राहणार आहे. केवळ औपचारिक शुभेच्छा न घेता समाजोपयोगी उपक्रमांच्या माध्यमातून सामाजिक बांधिलकी जपणे हा यामागचा मुख्य उद्देश असल्याचे ॲड. निता सावंत-कविटकर यांनी स्पष्ट केले.
यावेळी तालुकाप्रमुख दिनेश गावडे,
सभापती सुस्मिता जाधव, जिल्हा परिषद सदस्य सुधा कवठणकर, माजी सभापती अशोक दळवी, शहरप्रमुख बाबू कुडतरकर, दोडामार्ग तालुकाप्रमुख गणेशप्रसाद गवस, उपजिल्हाप्रमुख झेवियर फर्नांडिस, सचिव परिक्षीत मांजरेकर, पंचायत समिती सदस्य शरद धाऊसकर, प्रणाली टिळवे, नगरसेविका शर्वरी धारगळकर, स्नेहा नाईक, महिला शहरप्रमुख भारती मोरे, राजन रेडकर, नगरसेवक देव्या सूर्याजी, विनोद नाईक, क्लेटस फर्नांडिस, सचिन साटेलकर, विजय टिळवे यांच्यासह शिवसेना पदाधिकारी व कार्यकर्ते मोठ्या संख्येने उपस्थित होते.