९ ऑगस्ट क्रांती दिनाचे औचित्य; सिंधुदुर्गनगरी येथे विविध मान्यवरांच्या हस्ते गौरव
सावंतवाडी, दि.०९: माहितीच्या अधिकाराचा प्रभावी वापर करत अन्यायग्रस्तांना न्याय मिळवून देण्यासाठी सातत्याने कार्यरत असलेले माहिती अधिकार पदाधिकारी तथा माहिती अधिकार महासंघ महाराष्ट्र राज्याचे सावंतवाडी तालुकाध्यक्ष सुशिल रूपाजी चौगुले यांच्या सामाजिक व जनहिताच्या कार्याची दखल घेण्यात आली आहे. आज ९ ऑगस्ट रोजी क्रांती दिनाचे औचित्य साधून महाराष्ट्र राज्य पत्रकार संघ (मुंबई), कोकण बुक ऑफ रेकॉर्ड्स व यशश्री फाउंडेशन (सिंधुदुर्ग) यांच्या संयुक्त विद्यमाने आयोजित ‘कोकण कला व साहित्य गौरव संमेलन २०२६’ या कार्यक्रमात त्यांना ‘कोकण समाजभूषण पुरस्कार’ प्रदान करण्यात आला. सिंधुदुर्गनगरी येथील आचार्य बाळशास्त्री जांभेकर पत्रकार भवन येथे पार पडलेल्या या दिमाखदार सोहळ्यात जिल्हा परिषद अध्यक्ष प्रमोद कामत, ज्येष्ठ संगीतकार व गझलकार अतुल दिवे, सेवानिवृत्त उपमुख्य कार्यकारी अधिकारी विजय चव्हाण, सुप्रसिद्ध मराठी सिनेअभिनेत्री श्रुती पारकर, पर्यावरण क्षेत्रातील उल्लेखनीय योगदानाबद्दल राष्ट्रपती पुरस्कार विजेते तुषार शिवशरण, ज्येष्ठ कलावंत दादा राणे-कोनस्कर, ज्येष्ठ मालवणी कवी दादा मडकईकर आणि प्रा. डॉ. बी. एन. खरात यांच्या प्रमुख उपस्थितीत चौगुले यांना शाल, श्रीफळ, मानपत्र व सन्मानचिन्ह देऊन सन्मानपूर्वक गौरविण्यात आले.
सामान्य नागरिकांच्या हक्कांना बळ देणाऱ्या माहितीच्या अधिकार कायद्याचा प्रभावी आणि सनदशीर वापर करून अनेक अन्यायग्रस्तांना न्याय मिळवून देण्यासाठी सुशिल चौगुले यांनी सातत्याने पाठपुरावा केला आहे. कायद्याच्या चौकटीत राहून प्रश्नांना भिडणे, प्रशासनाकडून उत्तरदायित्व निश्चित करून घेणे आणि सामान्यांच्या हक्कांसाठी आवाज उठविणे, या कार्यपद्धतीमुळे त्यांनी सामाजिक क्षेत्रात आपली एक स्वतंत्र ओळख निर्माण केली आहे. याशिवाय शासकीय तसेच निमशासकीय कार्यालयांमध्ये अन्यायाला सामोरे जाणाऱ्या कर्मचाऱ्यांच्या प्रश्नांसाठीही त्यांनी सातत्याने योगदान दिले आहे. विविध प्रकरणांमध्ये कायदेशीर मार्गाने शासन दरबारी पाठपुरावा करून संबंधित प्रश्न मार्गी लावण्यासाठी त्यांनी प्रयत्न केले असून, कामात कुचराई करणाऱ्या अधिकाऱ्यांच्या कारभारावर प्रश्न उपस्थित करत कायद्याच्या माध्यमातून प्रशासनाला जाब विचारण्याचे काम त्यांनी केले आहे.
सामाजिक न्यायासाठी कायद्याची ताकद सामान्यांच्या हातात पोहोचविण्याचे कार्य, अन्यायग्रस्तांना न्याय मिळवून देण्यासाठी केलेला सातत्यपूर्ण पाठपुरावा आणि आपत्कालीन परिस्थितीत केलेले धाडसी कार्य या सर्व योगदानाचा गौरव म्हणून सुशिल चौगुले यांना ‘कोकण समाजभूषण’ पुरस्काराने सन्मानित करण्यात आले आहे. या विशेष सन्मानाबद्दल श्री. चौगुले यांचे सर्वत्र अभिनंदन होत असून त्यांच्यावर कौतुकाचा वर्षाव होत आहे.