९६ विद्यार्थ्यांच्या आरोग्यासाठी सामाजिक बांधीलकीतून महत्त्वपूर्ण उपक्रम
दोडामार्ग, दि.०९: विद्यार्थ्यांचे आरोग्य जपण्याच्या दृष्टीने आणि त्यांना शुद्ध पिण्याचे पाणी उपलब्ध करून देण्यासाठी जिल्हा परिषद केंद्र शाळा, दोडामार्ग क्रमांक १ येथे वॉटर प्युरिफायर वितरण सोहळा संपन्न झाला. या कार्यक्रमात सौ. वेदिकाताई विशाल परब यांच्या हस्ते शाळेसाठी वॉटर प्युरिफायरचे लोकार्पण करण्यात आले.
शाळेतील प्रत्येक विद्यार्थ्याला शुद्ध, सुरक्षित आणि आरोग्यदायी पिण्याचे पाणी मिळावे व त्यांच्या आरोग्याची हमी राहावी, या उद्देशाने हा सामाजिक उपक्रम हाती घेण्यात आला आहे. या माध्यमातून शाळेतील तब्बल ९६ विद्यार्थ्यांच्या आरोग्याची जबाबदारी स्वीकारण्यात आल्याचे समाधान आयोजकांनी व्यक्त केले. निरोगी शरीरातच निरोगी विचार वाढीस लागतात आणि त्यातूनच सक्षम पिढी घडते, असा सुर या वेळी उमटला.
कार्यक्रमा दरम्यान बोलताना सौ. वेदिकाताई विशाल परब म्हणाल्या की, हे केवळ एक मशीन नसून मुलांच्या उत्तम आरोग्यासाठी आणि उज्ज्वल भविष्यासाठी घातलेला मजबूत पाया आहे. ग्रामीण भागात अनेकदा दूषित पाण्यामुळे आरोग्याच्या विविध समस्या उद्भवतात, त्या टाळण्यासाठी हा छोटासा प्रयत्न करण्यात आला आहे. शाळेतील प्रत्येक विद्यार्थ्याने निरोगी राहून उत्तम शिक्षण घ्यावे आणि आपल्या गावाचे व देशाचे नाव उज्ज्वल करावे, हीच माफक अपेक्षा आहे. तसेच, भविष्यातही अशाच प्रकारचे सामाजिक व विद्यार्थीहितैषी उपक्रम सातत्याने राबवले जातील, असा विश्वास त्यांनी व्यक्त केला.
या वेळी शाळेतील मुलांच्या चेहऱ्यावरील आनंद, शिक्षक व ग्रामस्थांचे समाधान या उपक्रमाचे यश स्पष्ट करत होते. सोहळ्याला शाळेचे मुख्याध्यापक एम. एकता एकनाथ नाईक, शाळा व्यवस्थापन समिती अध्यक्ष सुमित गोपाळ दळवी, रंगनाथ गवस यांच्यासह शिक्षकवृंद व ग्रामस्थ मोठ्या संख्येने उपस्थित होते.