एमएचटी-सीईटी गुणवत्तेवर होणार प्रवेश; यशवंतराव भोसले कॉलेज ऑफ फार्मसीमध्ये कागदपत्र पडताळणीची सोय उपलब्ध
सावंतवाडी,दि.०४: महाराष्ट्र राज्य सामाईक प्रवेश परीक्षा कक्ष (सीईटी सेल) मार्फत शैक्षणिक वर्ष २०२६-२७ साठी चार वर्षांच्या बी. फार्मसी पदवी अभ्यासक्रमाच्या प्रथम वर्ष प्रवेश प्रक्रियेला अधिकृतरीत्या सुरुवात झाली आहे. एमएचटी-सीईटी (पीसीएम व पीसीबी) परीक्षेतील गुणवत्तेच्या आधारे ही प्रवेश प्रक्रिया राबविण्यात येणार असून, इच्छुक व पात्र विद्यार्थ्यांना ऑनलाइन अर्ज भरण्यासाठी आणि आवश्यक कागदपत्रे अपलोड करण्यासाठी १० ऑगस्ट रोजी सायंकाळी ५ वाजेपर्यंत मुदत देण्यात आली आहे.
प्रवेश प्रक्रियेच्या वेळापत्रकानुसार ३१ जुलैपासून सुरू झालेल्या या नोंदणीनंतर ६ ते १२ ऑगस्ट या कालावधीत कागदपत्रांची पडताळणी आणि अर्जाचे निश्चितीकरण केले जाणार आहे. त्यानंतर १३ ऑगस्ट रोजी विद्यार्थ्यांची तात्पुरती गुणवत्ता यादी प्रसिद्ध होईल, ज्यावर १४ ते १७ ऑगस्ट दरम्यान ऑनलाइन पद्धतीने हरकती नोंदविता येतील. या सर्व प्रक्रियेनंतर १९ ऑगस्ट रोजी अंतिम गुणवत्ता यादी जाहीर करण्यात येणार आहे.
प्रवेशासाठी अर्ज करणाऱ्या विद्यार्थ्यांना कागदपत्र पडताळणीसाठी ई-स्क्रुटिनी तसेच प्रत्यक्ष पडताळणी असे दोन्ही पर्याय उपलब्ध करून देण्यात आले आहेत. विद्यार्थ्यांच्या सोयीसाठी यशवंतराव भोसले कॉलेज ऑफ फार्मसी येथे प्रत्यक्ष कागदपत्र पडताळणीची सुविधा उपलब्ध करून देण्यात आली असून, प्रवेश प्रक्रियेसंदर्भात अधिक माहितीसाठी महाविद्यालयाच्या ९८२३९१६००५ या क्रमांकावर संपर्क साधण्याचे आवाहन प्रशासनाकडून करण्यात आले आहे.