शैक्षणिक, सामाजिक आणि बांधकाम क्षेत्रातील उल्लेखनीय योगदानाचा गौरव; सावंतवाडी तालुका भंडारी मंडळाचा उपक्रम
सावंतवाडी, दि.०३: शैक्षणिक, सामाजिक, सांस्कृतिक आणि बांधकाम क्षेत्रात उल्लेखनीय कार्य करून समाजजीवन समृद्ध करणारे डॉ. प्रा. दिनेश नागवेकर यांना सावंतवाडी तालुका भंडारी मंडळाच्या वतीने दिला जाणारा कै. सखाराम भगवान पिळणकर स्मृतीप्रित्यर्थ श्रीराम प्रतिष्ठान सिंधुदुर्ग अध्यक्ष संजय पिळणकर पुरस्कृत प्रतिष्ठेचा ‘भंडारी समाजरत्न’ पुरस्कार प्रदान करण्यात आला. दि. २ ऑगस्ट २०२६ रोजी येथील शहाबुद्दीन सभागृहात पार पडलेल्या दिमाखदार सोहळ्यात विविध मान्यवरांच्या हस्ते त्यांना या पुरस्काराने सन्मानित करण्यात आले.
डॉ. नागवेकर यांनी अभियंता, वास्तुशास्त्रज्ञ, शिक्षक आणि समाजसेवक या विविध भूमिकांतून अत्यंत उल्लेखनीय कार्य केले आहे. शिक्षणाचा प्रसार, सामाजिक बांधिलकी आणि विकासाभिमुख उपक्रमांमुळे त्यांनी समाजात आपली एक वेगळी ओळख निर्माण केली आहे. विशेष म्हणजे, डॉ. नागवेकर हे सावंतवाडी तालुका भंडारी मंडळाचे संस्थापक सेक्रेटरी असून, त्यांनी संस्थेच्या महिला वसतिगृहाच्या इमारतीचे नकाशे तयार करणे आणि पर्यवेक्षक म्हणून विनामूल्य सेवा बजावली होती.
त्यांच्या या चौफेर कार्याची दखल राष्ट्रीय स्तरावरही घेण्यात आली असून, विविध मान्यवर संस्थांकडून त्यांना यापूर्वीही अनेक पुरस्कारांनी गौरविण्यात आले आहे. शिक्षणक्षेत्रातील योगदान, समाजहितासाठी केलेले सातत्यपूर्ण प्रयत्न आणि बांधकाम क्षेत्रातील उत्कृष्ट कार्याचा गौरव म्हणूनच त्यांना हा मानाचा सन्मान प्रदान करण्यात आल्याची माहिती मंडळाच्या वतीने देण्यात आली.
या पुरस्कारामुळे डॉ. प्रा. दिनेश नागवेकर यांच्या निष्ठावंत कार्याचा यथोचित सन्मान झाला असून, समाजासाठी प्रेरणादायी काम करणाऱ्या व्यक्तिमत्त्वांचा गौरव करण्याची सावंतवाडी तालुका भंडारी मंडळाची परंपरा अधिक बळकट झाली आहे. या यशाबद्दल त्यांच्यावर सर्व स्तरातून शुभेच्छांचा वर्षाव होत आहे.
या सोहळ्याप्रसंगी माजी शिक्षण व आरोग्य सभापती गुरुनाथ पेडणेकर, अध्यक्ष प्रसाद अरविंदेकर, कार्यक्रमाचे अध्यक्ष तथा जिल्हा परिषद सदस्य सुदन उर्फ सुधा कवठणकर, पंचायत समिती सदस्य महेश धुरी, उदय पारिपत्य, भंडारी समाज जिल्हाध्यक्ष हेमंत कलंगुटकर, शीतल नाईक, संजय पिळणकर, सचिव दिलीप पेडणेकर, खजिनदार चंद्रकांत वाडकर, ज्ञानदीप राऊळ, नंदकिशोर कोंडये, देविदास आडारकर, प्रतिभा कांबळी, भरत कांबळी, सिद्धार्थ पराडकर, शंकर साळगावकर, हनुमंत पेडणेकर, समता सूर्याजी, बाळा आकेरकर, संतोष वैज, अजित कवठणकर, राजेंद्र बिर्जे, नारायण मसुरकर, विकी केरकर आणि गुंडू साटेलकर यांसह अनेक प्रमुख मान्यवर उपस्थित होते.