विद्यार्थ्यांकडून जन्मदात्यांचे पाद्यपूजन; उपस्थितांचे पाणावले डोळे
सिंधुदुर्ग,दि.०२: गुरुपौर्णिमेचे औचित्य साधून ‘गुरुकुल’मध्ये विद्यार्थ्यांचे पहिले गुरु असणाऱ्या जन्मदात्या आई-वडिलांच्या पूजनाचा ‘मातृ-पितृ कृतज्ञता सोहळा’ नुकताच मोठ्या उत्साहात आणि भक्तीमय वातावरणात पार पडला. संपूर्ण जिल्ह्यात प्रथमच आयोजित करण्यात आलेल्या या आगळ्यावेगळ्या आणि संस्कारक्षम सोहळ्याने उपस्थितांची मने जिंकली असून, या सोहळ्यासाठी जिल्ह्याच्या कानाकोपऱ्यातून पालकांनी मोठ्या संख्येने उपस्थिती लावली होती.
कार्यक्रमाची सुरुवात ईशस्तवन, सुमधुर स्वागतगीत, महर्षी व्यासांच्या प्रतिमेचे पूजन आणि सामूहिक प्रार्थनेने झाली. त्यानंतर सोहळ्यातील सर्वात भावनिक प्रसंगाला सुरुवात झाली. सर्व विद्यार्थ्यांनी आपल्या जन्मदात्या आई-वडिलांचे पाय धुऊन, गंधाक्षता लावून विधीवत पूजन केले व आरती ओवाळली. आजच्या धकाधकीच्या काळात आपल्या पाल्यांच्या हाताने होत असलेले हे भावपूर्ण पूजन पाहून अनेक पालक, विद्यार्थी आणि शिक्षकांचेही डोळे पाणावले.
या हृदयस्पर्शी प्रसंगानंतर, सर्व विद्यार्थ्यांनी आई-वडील आणि गुरुजनांशी कायम एकनिष्ठ राहण्याची व त्यांचा आदर करण्याची प्रतिज्ञा पालकांच्या साक्षीने घेतली. त्यानंतर सामूहिक प्रार्थना आणि पसायदानाने वातावरणात भक्तीचा रंग भरला गेला. याप्रसंगी अनेक विद्यार्थी, विद्यार्थिनी आणि पालकांनी अत्यंत भावूक होत आपली मनोगते व्यक्त केली व गुरुकुलच्या या संस्कारक्षम उपक्रमाचे भरभरून कौतुक केले.
या अनोख्या सोहळ्याला गुरुकुलच्या संचालिका सौ. श्रद्धाताई ढोणुकसे, प्रा. सुनील ढोणुकसे आणि क्रीडा प्रशिक्षक संकेत कदम यांच्यासह बहुसंख्येने विद्यार्थी व पालक उपस्थित होते. कार्यक्रम यशस्वी होण्यासाठी विद्यार्थी व शिक्षकांनी उत्कृष्ट नियोजन केले होते. या संपूर्ण कार्यक्रमाचे प्रास्ताविक, उत्कृष्ट सूत्रसंचालन आणि आभारप्रदर्शन प्रा. बी. एस. जांभेकर यांनी पार पाडले. सर्वांच्या उपस्थितीत पार पडलेल्या सहभोजनाने या अविस्मरणीय कार्यक्रमाची सांगता झाली.