जिल्हा मध्यवर्ती बँकेचे अध्यक्ष मनीष दळवी यांच्या मार्गदर्शनाखाली निवडणूक; सहकार शिक्षणावर नवनिर्वाचित अध्यक्षांचा भर
ओरोस,दि.३१: सिंधुदुर्ग जिल्हा सहकारी मंडळ मर्यादित या संस्थेच्या सन २०२६ ते २०३१ या कालावधीसाठीची निवडणूक बिनविरोध पार पडली आहे. गुरुवारी सिंधुदुर्गनगरी, ओरोस येथील मंडळाच्या कार्यालयात पार पडलेल्या बैठकीत अध्यक्ष व उपाध्यक्ष पदाची निवड बिनविरोध घोषित करण्यात आली. यामध्ये अध्यक्षपदी गजानन संभाजी सावंत तर उपाध्यक्षपदी विनोद रामचंद्र मर्गज यांची सर्वानुमते निवड करण्यात आली. या संपूर्ण प्रक्रियेत निवडणूक निर्णय अधिकारी म्हणून आर. टी. चौगुले यांनी कामकाज पाहिले.
सदर निवडणूक कार्यक्रम सिंधुदुर्ग जिल्हा मध्यवर्ती सहकारी बँकेचे अध्यक्ष मनीष दळवी यांच्या मार्गदर्शनाखाली पार पडला. निवडीनंतर दळवी यांच्या हस्ते नवनिर्वाचित अध्यक्ष गजानन सावंत आणि उपाध्यक्ष विनोद मर्गज यांचा शाल व श्रीफळ देऊन यथोचित सत्कार करण्यात आला. याप्रसंगी बोलताना, जिल्हा सहकारी मंडळाच्या भावी वाटचालीस व सहकार क्षेत्राच्या बळकटीकरणासाठी आपल्या व सहकाऱ्यांच्या वतीने आवश्यक ते सर्व सहकार्य सदैव केले जाईल, असे आश्वासन मनीष दळवी यांनी दिले.
आपली भूमिका स्पष्ट करताना नवनिर्वाचित अध्यक्ष गजानन सावंत व उपाध्यक्ष विनोद मर्गज यांनी जिल्ह्यातील सहकार चळवळीच्या पोषक वाढीचा संकल्प व्यक्त केला. जिल्ह्यातील सहकारी संस्था अधिक सक्षम करण्यासाठी सभासद, पदाधिकारी, कार्यकर्ते, अधिकारी व कर्मचाऱ्यांना बदलत्या काळानुसार अद्ययावत व प्रभावी सहकारी शिक्षण-प्रशिक्षण मंडळाच्या माध्यमातून दिले जाईल, अशी ग्वाही त्यांनी दिली.
या कार्यकारिणीत संचालक म्हणून विलासराव ऐनापुरे, गजानन गावडे, मधुसुदन गावडे, सुभाष तळवडेकर, केशव नारकर, प्रकाश सावंत व सुरेश चौकेकर यांची तर महिला संचालिका म्हणून कुंदा पै व प्रज्ञा परब यांची बिनविरोध निवड झाली आहे. या प्रसंगी जिल्हा सहकार विकास अधिकारी मंगेश पांचाळ यांच्यासह सहकार क्षेत्रातील पदाधिकारी उपस्थित होते.