सावंतवाडी,दि.२८: गुरुपौर्णिमेनिमित्त श्री क्षेत्र आदमापूर येथे श्री संत बाळूमामांच्या दर्शनासाठी जाणाऱ्या भाविकांच्या सोयीसाठी महाराष्ट्र राज्य मार्ग परिवहन महामंडळाच्या सावंतवाडी आगारा तर्फे बांदा–सावंतवाडी–आदमापूर अशी विशेष बससेवा सुरू करण्यात आली आहे.
२९ जुलै रोजी ही विशेष बस बांदा येथून सकाळी ७.३० वाजता, तर सावंतवाडी येथून सकाळी ८.०० वाजता आदमापूरसाठी सुटणार आहे. श्री बाळूमामांच्या दर्शनानंतर भाविकांना सुखरूप परतता यावे, यासाठी आदमापूर येथून परतीचा प्रवास दुपारी २.३० वाजता होणार आहे. ही बस आंबोली, आजरा, उत्तूर आणि गारगोटी मार्गे आदमापूरला धावणार आहे.
प्रवाशांच्या सोयीसाठी या विशेष बससेवेचे पूर्ण तिकीट २७० रुपये, तर अर्धे तिकीट १४५ रुपये इतके निश्चित करण्यात आले आहे. या प्रवासादरम्यान राज्य शासनाच्या सवलतींचा लाभ भाविकांना घेता येणार असून महिलांना व ज्येष्ठ नागरिकांना नियमानुसार ५० टक्के सवलत देण्यात आली आहे. तसेच अमृत ज्येष्ठ नागरिक योजनेअंतर्गत पात्र प्रवाशांना पूर्णपणे मोफत प्रवास सुविधा उपलब्ध करून देण्यात आली आहे. तरी बांदा, सावंतवाडी आणि परिसरातील जास्तीत जास्त भाविकांनी या विशेष बससेवेचा लाभ घ्यावा, असे आवाहन सावंतवाडी आगार प्रशासनाने केले आहे.