सिंधुदुर्गच्या सूक्ष्मचित्रकार श्रुती सुतार हिचा भक्ती आणि कलेचा अनोखा संगम
वैभववाडी,दि.२५: आषाढी एकादशीच्या पावन पर्वावर वारकरी संप्रदायात अलोट उत्साह असतो. याच भक्तीमय वातावरणात सिंधुदुर्ग जिल्ह्यातील गडमठ (ता. वैभववाडी) येथील चित्रकार श्रुती संतोष सुतार हिने आपल्या अनोख्या कल्पकतेतून विठ्ठलभक्तीचा सुरेख आविष्कार घडवला आहे. पारंपरिक कॅनव्हासला फाटा देत श्रुतीने चक्क वारकऱ्यांच्या भक्तीचे आणि नामस्मरणाचे प्रतीक असलेल्या ‘वीणे’वर भगवान श्री विठ्ठल आणि माता रुक्मिणी यांची देखणी प्रतिमा साकारली आहे.
वारकरी संप्रदायात वीणा हे केवळ एक वाद्य नसून ते अखंड नामस्मरण, भक्ती आणि अध्यात्माचे परम प्रतीक मानले जाते. ‘राम कृष्ण हरी’चा गजर करत वारकरी श्रद्धेने वीणा गळ्यात धारण करतात. याच कल्पनेतून प्रेरणा घेत श्रुतीने भक्ती आणि कलेचा हा अनोखा संगम साधला आहे. तिने ऍक्रेलिक रंगांचा वापर करून वीणेवर ६.५ इंचाचे श्री विठ्ठल आणि ५.५ इंचाची माता रुक्मिणी यांची सूक्ष्म व रेखीव चित्रे रेखाटली आहेत. या कलाकृतीच्या माध्यमातून तिने सर्व भाविकांना आषाढी एकादशीच्या मनःपूर्वक शुभेच्छा दिल्या आहेत.
श्रुती सुतार हिची सूक्ष्मचित्रांमधील (Micro art) ही पहिलीच कमाल नाही. यापूर्वीही तिने आपल्या अफाट कल्पकतेतून आणि सामाजिक जाणीवेतून अनेक वैशिष्ट्यपूर्ण कलाकृती साकारल्या आहेत. रुईच्या पानावर मारुतीराया, गंधगोळीवर श्रीविठ्ठल, तुळशीच्या पानावर आणि मोरपिसावर श्रीकृष्ण, एवढेच नव्हे तर अत्यंत सूक्ष्म टिकलीवर नऊ दुर्गांची चित्रे आणि ज्येष्ठ गायिका आशा भोसले यांची कलाकृती तिने लीलया साकारली आहे. तिच्या प्रत्येक कलाकृतीतून कलेसोबतच एक सुंदर सामाजिक व सांस्कृतिक संदेश दिसून येतो. गडमठसारख्या ग्रामीण भागातील या तरुणीच्या अनोख्या उपक्रमाचे आणि कलेचे सर्व स्तरातून कौतुक होत आहे.