काकड आरती, महापूजा, संगीत गायन, भजने, कीर्तन आणि पालखी सोहळ्याची रेलचेल; भाविकांना उपस्थित राहण्याचे आवाहन
सावंतवाडी,दि.२४ : श्री देव विठ्ठल रुख्मिणी मंदिर, सावंतवाडी येथे आषाढी महाएकादशीच्या पवित्र पर्वावर विविध धार्मिक व सांस्कृतिक कार्यक्रमांचे भव्य आयोजन करण्यात आले आहे. या सर्व कार्यक्रमांचा भाविकांनी उत्स्फूर्तपणे लाभ घ्यावा, असे आवाहन मंदिर समितीच्या वतीने करण्यात आले आहे.
शनिवार, २५ जुलै २०२६ रोजी सकाळी ६ वाजता काकड आरती आणि महापूजेने या धार्मिक उत्सवाला सुरुवात होणार आहे. पूजेचे मानकरी म्हणून शेखर गुरुनाथ धारगळकर आणि नगरसेविका सौ. शर्वरी शेखर धारगळकर यांची उपस्थिती असणार असून त्यांच्या हस्ते श्रींची महापूजा पार पडेल. त्यानंतर सकाळी ११.३० ते दुपारी २.०० या वेळेत ‘श्री सद्गुरु संगीत विद्यालय’ यांच्या वतीने सुश्राव्य भक्ति संगीताचा कार्यक्रम सादर केला जाईल.
दुपारी २ ते ३ या वेळेत ‘श्री कालिका देवी भजनी मंडळ, कारिवडे’ यांच्या भजनाचा कार्यक्रम होईल. त्यानंतर दुपारी ३ ते ४ या वेळेत महिला मंडळ सावंतवाडी यांच्या भजनाचा कार्यक्रम आयोजित करण्यात आला आहे. सायंकाळी ४ ते ६ या वेळेत पंडित योगेश बोरचाटे (माणगाव) यांच्या सुश्राव्य संगीत गायनाचा कार्यक्रम रंगणार आहे. सायंकाळी ६ ते ८ या वेळेत कीर्तनभूषण ह. भ. प. विलासबुवा गरवारे (पुरोली सिद्धेश्वर, सातारा) यांचे कीर्तन होईल आणि त्यानंतर रात्री ९ नंतर श्रींची भव्य पालखी सोहळा पार पडणार आहे.
आषाढी एकादशीनंतरही मंदिरात विविध धार्मिक कार्यक्रमांची मालिका सुरूच राहणार आहे. रविवारी सायंकाळी ६ ते ८ या वेळेत ह. भ. प. विलासबुवा गरवारे यांचे कीर्तन व रात्री ९ वाजता श्रींची पालखी सेवा पार पडेल. सोमवारी देखील सायंकाळी ६ ते ८ या वेळेत ह. भ. प. विलासबुवा गरवारे यांचे कीर्तन आयोजित करण्यात आले आहे.
मंगळवारी सायंकाळी ६ ते ८ या वेळेत कीर्तनभूषण ह. भ. प. सौ. सिद्धी मेस्त्री (ओटवणे) यांचे कीर्तन होईल. तसेच बुधवारी सायंकाळी ६ ते ८ या वेळेत कीर्तनभूषण ह. भ. प. श्री हृदयनाथ गावडे (साळगाव) यांचे काला कीर्तन संपन्न होणार आहे. या सर्व धार्मिक व सांस्कृतिक कार्यक्रमांचा सर्व भाविकांनी आणि नगरिकांनी भक्तिभावाने लाभ घ्यावा, असे आवाहन मंदिर समिती व सदस्य आबा केसरकर यांच्या वतीने करण्यात आले आहे.