पावसामुळे जुने झाड उन्मळून थेट मंदिरावर पडले; स्थानिक ग्रामस्थांची घटनास्थळी धाव
सावंतवाडी, दि.२२: सावंतवाडी शहरातील श्रद्धास्थान म्हणून ओळखल्या जाणाऱ्या माठेवाडी येथील प्रसिद्ध श्री आत्मेश्वर मंदिरावर आज अचानक आंब्याचे एक मोठे झाड कोसळल्याची घटना घडली. झाड थेट मंदिराच्या छतावर पडल्याने मोठे नुकसान झाले आहे. सुदैवाने या घटनेत कोणतीही जीवितहानी झालेली नाही.
गेल्या काही दिवसांपासून परिसरात होत असलेल्या हवामानातील बदलांमुळे आणि पावसामुळे हे जुने आंब्याचे झाड उन्मळून पडल्याचे सांगितले जात आहे. झाड पडताना झालेला मोठा आवाज ऐकून स्थानिक रहिवासी आणि भाविकांनी तत्काळ मंदिराकडे धाव घेतली.
घटनेची माहिती मिळताच माठेवाडीतील स्थानिक नागरिक, मंदिराचे विश्वस्त आणि तरुण मंडळाचे कार्यकर्ते घटनास्थळी दाखल झाले आहेत.
श्री आत्मेश्वर मंदिर हे स्थानिक भाविकांचे श्रद्धास्थान असल्याने या दुर्घटनेमुळे भाविकांमधून हळहळ व्यक्त केली जात आहे. प्रशासनाने आणि संबंधित विभागाने त्वरित घटनास्थळाची पाहणी करून नुकसान भरपाई आणि मंदिर दुरुस्तीसाठी मदत करावी, अशी मागणी स्थानिक ग्रामस्थांकडून केली जात आहे.