अध्यक्ष प्रा. सतीश बागवे यांच्याकडून आभार व्यक्त; उपक्रमाला नेहमीच मदतीचा हात
सावंतवाडी,दि.२१: सामाजिक भान जपत विरांश टूर अँड ट्रॅव्हलर्सचे मालक अजित मठकर यांनी आपल्या वाढदिवसाचे औचित्य साधून ‘सामाजिक बांधिलकी प्रतिष्ठान’च्या सेवाभावी कार्यासाठी ८,००० रुपयांची आर्थिक मदत सुपूर्द केली.
अजित मठकर हे सामाजिक बांधिलकी प्रतिष्ठानच्या विविध सामाजिक व सेवाभावी उपक्रमांमध्ये नेहमीच अग्रभागी राहून मदतीचा हात देत असतात. त्यांच्या या निरंतर सहकार्याबद्दल प्रतिष्ठानचे अध्यक्ष प्राध्यापक सतीश बागवे यांनी त्यांचे विशेष आभार मानले. समाजातील घटकांसाठी कार्य करणाऱ्या संस्थांना अशी मदत मिळाल्याने कार्याला अधिक बळ मिळते, अशी भावना या वेळी व्यक्त करण्यात आली.
देणगी हस्तांतरणाच्या या प्रसंगी सामाजिक बांधिलकी प्रतिष्ठानचे रवी जाधव, लक्ष्मण कदम, रूपा मुद्राळे, पियुष टिळवे, रुपेश परब, चिरायू टोपले, शरद साळगावकर आणि पावलू डिसोजा यांच्यासह इतर मान्यवर व कार्यकर्ते उपस्थित होते.