शिवसेना जिल्हाप्रमुख संजू परब यांच्या हस्ते शुभारंभ; नागरिकांचा उत्स्फूर्त प्रतिसाद
सावंतवाडी,दि.२०: सावंतवाडी मतदारसंघाचे लोकप्रिय आमदार तथा राज्याचे माजी शालेय शिक्षण मंत्री दीपकभाई केसरकर यांच्या वाढदिवसाचे औचित्य साधून मतदारसंघात भव्य ‘महाआरोग्य शिबिराचे’ आयोजन करण्यात आले होते. या शिबिराचे उद्घाटन शिवसेना जिल्हाप्रमुख संजू परब यांच्या हस्ते उत्साहात संपन्न झाले. या महाआरोग्य शिबिरातून परिसरातील नागरिकांना विविध तज्ज्ञ डॉक्टरांकडून मोफत आरोग्य तपासणी, उपचार आणि वैद्यकीय मार्गदर्शन उपलब्ध करून देण्यात आले. आपल्या लाडक्या लोकप्रतिनिधीच्या वाढदिवसानिमित्त सामाजिक बांधिलकी जपत राबवण्यात आलेल्या या उपक्रमाचे नागरिकांनी स्वागत केले असून, शिबिराला नागरिकांचा उत्स्फूर्त प्रतिसाद लाभला.
या उद्घाटन प्रसंगी महिला जिल्हाप्रमुख ॲड. नीता सावंत-कविटकर, माजी जिल्हाप्रमुख अशोक दळवी, पंचायत समिती सभापती सुश्मिता जाधव, तालुकाप्रमुख बबन राणे, जिल्हा सचिव परीक्षित मांजरेकर, नगरसेवक देव्या सूर्याजी, नगरसेविका शर्वरी धारगळकर, स्नेहा नाईक, विश्वास घाग, सुप्रिता धारणकर, पूजा नाईक, राजश्री निर्गुण यांच्यासह शिवसेनेचे पदाधिकारी आणि कार्यकर्ते मोठ्या संख्येने उपस्थित होते.
तसेच हे शिबिर यशस्वी करण्यासाठी उपजिल्हा रुग्णालय आणि के.एल.ई. हॉस्पिटलचे सर्व तज्ज्ञ डॉक्टर, परिचारिका व कर्मचारी यांचीही उपस्थिती लाभली. शिबिरात आलेल्या प्रत्येक रुग्णाची काळजीपूर्वक तपासणी करून त्यांना मोफत औषधोपचार आणि आरोग्याविषयी मोलाचे मार्गदर्शन करण्यात आले. आमदारांच्या वाढदिवसानिमित्त राबवण्यात आलेल्या या स्तुत्य उपक्रमाचे सावंतवाडी तालुक्यातून सर्वत्र कौतुक होत आहे.
