शिवसेना जिल्हाप्रमुख संजू परब यांच्या उपस्थितीत गरजूंना मदतीचा हात
सावंतवाडी, दि.१७: सावंतवाडी मतदारसंघाचे लोकप्रिय आमदार दीपकभाई केसरकर यांच्या वाढदिवसाचे औचित्य साधून दरवर्षीप्रमाणे यंदाही विविध सामाजिक उपक्रमांचे आयोजन करण्यात आले आहे. या सामाजिक उपक्रमांचा शुभारंभ आज सावंतवाडी नगरपालिकेतील सफाई कर्मचाऱ्यांना धान्य वाटप करून करण्यात आला.
आमदार केसरकर यांचा वाढदिवस हा केवळ एक उत्सव म्हणून साजरा न करता, विविध लोकोपयोगी आणि सामाजिक कार्यांद्वारे साजरा करण्याची परंपरा कार्यकर्त्यांनी यंदाही जपली आहे. आज झालेल्या या कार्यक्रमात नगरपालिकेच्या सर्व सफाई कामगारांना शिवसेना जिल्हाप्रमुख संजू परब यांच्या हस्ते धान्य वाटप करण्यात आले. दैनंदिन जीवनात शहर स्वच्छ ठेवून मोलाची सेवा बजावणाऱ्या या कर्मचाऱ्यांना त्यांच्या हक्काची मदत पोहचवून या वाढदिवस सप्ताहाची अतिशय सकारात्मक सुरुवात करण्यात आली आहे.
याप्रसंगी शिवसेना पक्षाचे सर्व प्रमुख पदाधिकारी आणि कार्यकर्ते मोठ्या संख्येने उपस्थित होते. यामध्ये प्रामुख्याने जिल्हाप्रमुख संजू परब, महिला जिल्हाप्रमुख तथा नगरसेविका ॲड. नीता सावंत-कविटकर, माजी जिल्हाप्रमुख अशोक दळवी, तालुकाप्रमुख दिनेश गावडे, नगरसेविका शर्वरी धारगळकर, ॲड. सायली दुभाषी, स्नेहा नाईक तसेच पंचायत समिती सदस्य प्रणाली टिळवे, अजय गोंदावळे, जिल्हा सचिव परीक्षित मांजरेकर, अर्चित पोकळे, शैलेश मेस्त्री, सुनील नाईक, हर्षा जाधव, सुप्रिता धारणकर, पूजा नाईक, भारती परब, राजश्री निर्गुण आणि निलम कुमठेकर आदींचा समावेश होता. या सर्व मान्यवरांच्या आणि शिवसेना कार्यकर्त्यांच्या उपस्थितीत हा धान्य वाटपाचा कार्यक्रम उत्साहात पार पडला, ज्याचा लाभ पालिकेतील सर्व सफाई कर्मचाऱ्यांना मिळाला.