वेत्ये गावचे सरपंच गुणाजी गावडे यांच्या तत्परतेमुळे जखमीला वेळेत उपचार; सर्वत्र कौतुकाचा वर्षाव
सावंतवाडी, दि.१६: सावंतवाडी-शिरोडा मार्गावरील सर्वोदयनगर येथे आज एका भरधाव दुचाकीचा भीषण अपघात झाला. या अपघातात चराठा येथील दुचाकीस्वार युवक दिनेश जाधव हे जखमी झाले असून अपघातानंतर काही काळ परिसरात एकच खळबळ उडाली होती.
याचवेळी त्याच मार्गाने दुचाकीवरून प्रवास करणारे वेत्ये गावचे सरपंच गुणाजी गावडे यांनी अपघाताचे भीषण दृश्य पाहताच क्षणाचाही विलंब न करता घटनास्थळी धाव घेतली. त्यांनी जखमीला धीर देत स्थानिकांच्या मदतीने तातडीने रुग्णवाहिकेची व्यवस्था केली आणि स्वतः पुढाकार घेऊन जखमी दिनेश जाधव यांना सावंतवाडीतील खाजगी रुग्णालयात उपचारासाठी दाखल केले. सरपंच गुणाजी गावडे यांच्या तत्परतेमुळे, मानवतावादी भूमिकेमुळे आणि समयसूचकतेमुळे जखमी युवकाला वेळेत उपचार मिळणे शक्य झाले.
दरम्यान, घटनेची माहिती मिळताच सावंतवाडीचे सहाय्यक पोलीस उपनिरीक्षक सुमित पीरणकर तात्काळ घटनास्थळी दाखल झाले आणि त्यांनी घटनेची गंभीर दखल घेत अपघातग्रस्तांना मदत केली. याचवेळी सामाजिक कार्यकर्ते तथा माजी सभापती मंगेश तळववणेकर, माहिती अधिकार पदाधिकारी सुशील चौगुले, सुमेध गावडे,यांनी घटनास्थळी धाव घेत परिस्थिती अत्यंत योग्य पद्धतीने हाताळली.
अपघाताच्या कठीण प्रसंगी सरपंच गुणाजी गावडे यांनी दाखवलेल्या या संवेदनशील कृतीचे नागरिकांकडून सर्वत्र भरभरून कौतुक होत असून, “अपघातग्रस्तासाठी सरपंचच देवदूत ठरले!” अशा प्रतिक्रिया परिसरातून व्यक्त होत आहेत. या अपघाताचे नेमके कारण अद्याप स्पष्ट झाले नसून पोलीस याप्रकरणी अधिक तपास करत आहेत.