पालकमंत्री नितेश राणे आणि आ. निलेश राणे यांच्याकडून ज्येष्ठ पत्रकार सिताराम गावडे यांचे सांत्वन
सावंतवाडी,दि.१६: मुलाचे दुःख हे आई-वडिलांसाठी कधीही न पचवता येण्यासारखे असते. मात्र, या अत्यंत कठीण प्रसंगात स्वतःला सावरा आणि कुटुंबाची काळजी घ्या, अशा शब्दांत राज्याचे मत्स्य व्यवसाय व बंदरे विकास मंत्री तथा सिंधुदुर्ग जिल्ह्याचे पालकमंत्री ना. नितेश राणे आणि कुडाळ-मालवण मतदारसंघाचे आमदार निलेश राणे यांनी पत्रकार सिताराम गावडे व त्यांच्या कुटुंबीयांचे सांत्वन केले.
कोकण लाईव्ह ब्रेकिंग न्यूज चॅनलचे संपादक, ज्येष्ठ पत्रकार तथा सकल मराठा व सकल हिंदू संघटनेचे जिल्हाध्यक्ष सिताराम गावडे यांचा मुलगा समर्थ सिताराम गावडे याचे बुधवारी रात्री दहा वाजण्याच्या सुमारास दुःखद निधन झाले. या वेदनादायी घटनेची माहिती मिळताच राणे बंधूंनी गुरुवारी (१६ रोजी) गावडे यांच्या निवासस्थानी स्वतंत्रपणे भेट देऊन त्यांचे व कुटुंबियांचे सांत्वन केले आणि धीर दिला.
स्वतःला सावरा, कुटुंबाची काळजी घ्या: पालकमंत्री नितेश राणे
दुपारी निवासस्थानी भेट दिल्यानंतर पालकमंत्री नितेश राणे म्हणाले की, “ही घटना अत्यंत वेदना देणारी आणि धक्कादायक आहे. या प्रसंगात तुम्ही आता धीर धरण्याची गरज आहे. स्वतःची आणि संपूर्ण कुटुंबाची काळजी घ्या.”
यावेळी सावंतवाडी नगरपरिषदेच्या नगराध्यक्षा सौ. श्रद्धा भोंसले, जिल्हा बँक अध्यक्ष मनीष दळवी, जिल्हा बँक संचालक महेश सारंग, रवी मडगावकर, गजानन गावडे, विद्याधर परब, नगरपरिषद सभापती सुधीर आडीवरेकर, आनंद नेवगी, प्रतीक बांदेकर, माजी नगरसेवक उदय नाईक, अमित गवंडळकर तसेच जिल्हा पत्रकार संघाचे उपाध्यक्ष संतोष राऊळ आदी मान्यवर उपस्थित होते.
आम्ही तुमच्या दुःखात सहभागी: आमदार निलेश राणे
याप्रसंगी शिवसेना जिल्हाप्रमुख संजू परब आणि उपजिल्हाप्रमुख झेवियर फर्नांडिस उपस्थित होते. या दोन्ही नेत्यांच्या भेटीदरम्यान उपस्थित असलेल्या सर्वांनीच समर्थ गावडे याला भावपूर्ण श्रद्धांजली अर्पण केली.